Siglir tar il cuntegn
Inhalt

Chantun Fatbike – il nov trend da quest enviern?

Il fatbike è in velo per l’enviern. Cun ses gross pneus ch’han pauca aria pon ils velocipedists e las velocipedistas ir sur naiv e glatsch. L’interess dad ir cun velo da tutta aura e da mintga stagiun e fitg grond. Dentant n’è il fatbike betg il nov trend da sport d’enviern.

Cun ses gross pneus ch’han pauca aria pon velocipedists ir sur naiv e glatsch.
Legenda: In fatbike: Cun ses gross pneus ch’han pauca aria pon velocipedists ir sur naiv e glatsch. RTR, L. Cadonau

La dumonda suenter in fatbike n’è betg gronda, di Sepp Hendry da Casutt Velos. I fa grond tschaffen dad ir cun in fatbike, dentant i dovra cundiziuns idealas. La pista na duai betg esser memia dira. Per ir ensi n’è il velo betg ideal. Il fatbike è in velo per planiras e per ir engiu. Ir naiv nova n’è betg pussaivel.

Vitiers datti anc auters velos ch’ins po era duvrar per ils mais fraids da l’onn. Quels velos han pneus pli satigls ed ins po barattar pli simpel cun ils pneus da stad. Quai en velos per mintga stagiun e correspundan als desideris dals clients.

Reacziuns da differentas destinaziuns

La dumonda da fatbikes n’è betg uschè gronda e fin ussa èn be pitschnas gruppas sin via. Tuttina han intginas destinaziuns reagì: A Lai pon ins prender a fit fatbikes ed igl è lubì dad ir sin sendas da viandar. Sin pista n’èn ils fatbikes betg lubids. A San Murezzan hai dà la stad vargada adina puspè conflicts tranter peduns e velocipedists.

Responsabels elavuran perquai ina strategia per la stad ed han cumpiglià era la purschida per l’enviern en la discussiun. La destinaziun Mustér Sedrun organisescha in «Fatbike Battle». Ils 4 fin ils 6 da mars pon interessads prender part a differentas concurrenzas cun fatbikes.