Ils chanuns da naiv lavuran cun tutta forza en il territori da skis da Flem Laax Falera, notg e di. Dentant mo, sche las temperaturas lubeschian quai, di Balzer Arpagaus, schef da l’ennavada e dal provediment cun aua. Els na veglian betg duvrar electricitad per il giat. Ch’in chanun na produceschi tuttenina betg naiv, perquai che la temperatura saja pli chauda, na saja è betg pussaivel. Ils chanuns hajan quasi in tscharvè, uschia ch’els decidian sez, cura far naiv, e cura betg.
Naginas pistas da glatsch
Exact quai dian era ils responsabel da las pendicularas da Sedrun, Arosa Lai e Samignun. Ì vegnia mo fatg naiv sche las temperaturas e l’umiditad sajan bunas. Mario Jenal, directur da las pendicularas da Samignun agiunta, che quai dess pistas da glatsch, sch’ins laschass ir ils chanuns, senza ch’els produceschian naiv.
Dunna Holla na prenda betg giu il telefon
Malgrà ch’ils chanuns en il chantun lavuran cun tutta forza, giavischan tuts ch’i navess bainprest, quai fiss il pli bel regal da Nadal. Malgrà che Balzer Arpagaus vegn clamà dunna Holla, na po el betg laschar naiver naiv giu da tschel. E sch’el telefonia a dunna Holla, lura prendia ella betg giu il telefon. Tgunsch sajan ils Germans ed ils Austriacs vi da telefonar ad ella.
RR actualitad 06:00