La valitaziun media l’onn 2016 è tar 19.54 (2015: 19.45 puncts) da 20 puncts pussibels – e quai tar ina participaziun da 90 alps. Signunas e signuns han preschanta mintgamai 2 chascholas ch’èn vegnidas fatgas en la segunda mesadad da fanadur.
Ils megliers otg dal Grischun
A la 17avla premiaziun chantunala da chaschiels d’alp grischuns han ina signuna e set signuns fatg il resultat da 20 puncts e cun quai la valitaziun excellent per lur chaschiel:
- Walter Boos – Alp Naustgel, Sumvitg
- Petra Kienzle – Alp Russein, Mustér
- Marco Pangrazzi – Alp Larein, Jenaz
- Valentin Peer - Alp Uina Dadaint, Sent
- Walter Niklaus – Alp Maran, Cuira
- Christopher Krauel – Alp Sattel, Zezras
- Felix Tanner - Alp Kleinguraletsch, Val S.Pieder
- Luis Alfonso – Alp Peil, Val S.Pieder
Il di da premiaziun al Plantahof a Landquart ha dentant cummenzà las 09:00 la bun'ura. Lura eran els arrivads – signunas, pasters, chaus d'alp, paurs e visitas. Per alp han els mintgamai purtà duas chascholas. Ina è vegnida tagliada si per valitar, l'autra era per avair ina referenza dubla.
Examinaziun stretgamain tenor in catalog
Alura èn ils experts sa mess vi da la lavur. Durant duas uras han els examinà chaschola per chaschola - e quai tenor in catalog exact da criteris per il chaschiel d'alp grischun. Els han valità las chascholas tenor l'exteriur, las foras, la pasta ed il aroma. Tut la valitaziun dat in total da maximalmain 20 puncts e minimalmain 18.
Il chaschiel 2016 è excellent
Bruno Beerli, il cussegliader per l'economia d'alp al Plantahof, straglischa sur tut la fatscha: Quest onn haja dat grazia a l'aura bler latg sin las alps grischunas e da quel hajan las signunas ed ils signuns fatg in chaschiel da fitg buna qualitad. Auter ch'anc il 2015 haja la plievgia procurà per avunda aua per ils animals. En media eran quels 90 enfin 100 dis ad alp.
Ils experts èn critics
Malgrad ch'il Plantahof dat cussegl, sustegn e scolescha il persunal da las alps grischunas, dettian ils sis experts valitaziuns severas, di il signun Meinrad Abt dal Partenz. Mo cun emprender teoria na saja quai betg fatg.
La qualitad dal chaschiel d'alp dependia dad ina paletta multifara da criteris. Impurtant sin alp saja da collavurar bain - e quai era, sch'i dat situaziuns pli pauc agreablas u sche quai saja da svidar davent latg, raquinta Abt.
La premiaziun - aspect economic, ma era social e didactic
Cun la premiaziun finescha tradiziunalmain era la stad d'alp. Auter che pli baud na van ils experts betg pli sin las singulas alps, ma envidan il persunal dad alp a l'inscunter a Landquart. Quai saja tant in grazia fitg per la lavur prestada ad alp, uschia Bruno Beerli, ma er la pussaivladad da s’inscuntrar e discutar.
Durant ch'ils experts termineschan lur taxaziuns porscha perquai il Plantahof trais referats per ses giasts dad alp. Da las radund 120 alps en Grischun èn sa participadas 90 a la premiaziun.
RR actualitad 17:00