Examinar il svilup da vischnancas fusiunadas

Ensemen cun la scola auta da tecnica ed economia Cuira vul il chantun examinar tge consequenzas che las fusiuns da vischnanca han.

Scuol e Sent davent da Tarasp.

Legenda da maletgs: Sco Scuol han bleras vischnancas fusiunà ils ultims onns. ANR, Benedict Stecher

Perquai che bleras vischnancas han fusiunà è il dumber da vischnancas grischunas sa reducì sin bunamain la mesadad dapi l’onn 2000. Il chantun vul uss analisar il svilup da quellas vischnancas fusiunadas, quai communitgescha il departament da finanzas e vischnancas.

Il center per management d'administraziun (CMA) da la SATE Cuira ha elavurà in'uschenumnada «controlla da las fusiuns» che vegn gia applitgada en ils chantuns Glaruna, Berna e Turitg. Cun agid da differents indicaturs duai vegnir mesirà l'effect da las fusiuns da vischnancas. La gronda part dals 27 indicaturs ch'èn relevants per il chantun Grischun, pon vegnir elavurads cun datas ch'il chantun e las vischnancas han a disposiziun.

Plinavant ha er la populaziun la pussaivladad da s'exprimer. Il departament da finanzas e vischnancas supplitgescha perquai la populaziun da sa participar activamain a l'enquista e da contribuir uschia al success da quest project. Ensemen cun la scola auta da tecnica ed economia a Cuira elavurescha il chantun uschia in rapport davart l'effect da las fusiuns da vischnancas, per mauns dal Cussegl grond.

RR novitads 09:00