Siglir tar il cuntegn
cuntegn

Chantun «Evi» porta naiv – e disturbis dal traffic

Ferms vents e la naiv han procurà la damaun curt avant las 5 e mesa en il Partenz e la Surselva per interrupziuns dal current electric, quai scriva la Repower. Pertutgadas èn stadas las regiuns da Valzeina ed Igis, però era Laax. En tut eran radund 2'500 chasadas pertutgadas dal disturbi, quel ha durà tranter 25 minutas ed duas uras e mez.

Disturbis sin las vias grischunas

La bunura eran chadainas obligatoricas tranter Rehanau e Glion, sin il pass dal Wolfgang e tranter Cuira e Lai. Quai ha lura era chaschunà colonnas e traffic stagnant.

Colonnas e disturbis hai era dà sin l'autostrada A13 en il Grischun. Quai per part da la blera naiv, e per part tras las lavurs da rumir la naiv. L'autostrada A13 era serrada per camiuns cun char annex da Tusaun fin a Roveredo.

Disturbis en l'entira Svizra

Sin il Chasseral en il Giura Bernais èn vegnids registrads vents da fin a 156 km/h, sin il Jungfraujoch fin a 163 km/h, rapportan servetschs meteorologics. Quels han derschì plantas. Uschia è era l’autostrada A13 stada serrada e bloccada temporarmain tranter Horgen e Thalwil tras plantas.

Era pliras viafiers han annunzià da spetgar cun il manaschi pervi dal vent e betg cursar. Quai pertutga tschancuns da la viafier da l'Appenzell . En la Svizra romanda èn stritgads plirs trens tranter Haut-de-Caux e Rochers-de-Naye.

Legenda: Guardar il video La notg ha purtà blera naiv al Grischun. Durada 00:16 minutas.
Or da RTR dals 17.01.2018.

RR novitads 07:30+

SITUAZIUN ACTUALA