Per las mattas dat quai schuppa da broccoli per princessas e per ils mats schuppa da tomatas per eroxs. L'uffant na sa dumonda betg sco emprim avess jau gust sin schuppa da tomatas ubain da broccoli, ma «sun jau in erox ubain ina princessa». Uschia funcziuna marketing da gender.
Stereotips per vender chaussas a dunnas ubain ad umens
L'exempel da la schuppa na funcziuna betg be per uffants. In artitgel da la «Zeit» fa in sumegliant test era cun creschids. S'imaginai, che quai dess schuppa da broccoli per persunas che san englais e schuppa da tomatas per persunas che na san betg englais.
Enstagl da sa dumandar «avess jau pli gugent schuppa da tomatas ubain da broccoli» sa dumond'ins automaticamain «sai jau englais»?
Damain dunnas en las medias
Betg be en las reclamas pon stereotips esser problematics u schizunt sexistics, er en las medias en general, pia en la televisiun, en il radio ubain en artitgels da gasettas dat quai anc adina inegualitads. Uschia sajan dunnas anc adina sutrepreschentadas en las medias.
Quai è il resultat dad in tutorial interregiunal dal biro d'egualitad tranter um e dunna dal Grischun ensemen cun ils biros correspundents dal Principadi da Liechtenstein e dal Vorarlberg.
RR actualitad 12:00