Siglir tar il cuntegn
Inhalt

Gieus olimpics 2026 Er Scuol dastga sustegnair ils aderents dad Olimpia

In ulteriur recurrent fa naufragi cun crititgar donaziuns da vischnancas a campagna electorala pro-gieus olimpics 2026: La regenza refusescha in recurs cun critica a la vischnanca da Scuol per avair dat 1’000 francs. Il recurrent ha communitgà da vulair trair vinavant la decisiun da la regenza.

Chasa Grischa.
Legenda: La regenza grischuna refusescha in ulteriur recurs cunter donaziuns en connex cun las votaziuns als 12 da favrer. RTR / Isabelle Jaeger

La vischnanca da Scuol ha dà al cumbat electoral per la candidatura grischuna per gieus olimpics il 2026 ina donaziun da 1’000 francs. Il recurrent ha pretendì che la donaziun vegnia impedida u restituida. La regenza grischuna refusa uss quest recurs.

Argument da la regenza per refusar il recurs resta il medem

L’argument da la regenza è il medem ch’ella aveva fatg valair tar ils dus recurs cunter Arosa e San Murezzan: La vischnanca stoppia esser pertutgada directamain d’ina votaziun per pudair sustegnair in cumbat electoral.

Arosa e San Murezzan eran pertutgads sco lieus entretschads en eventuals Gieus olimpics 2026 en il Grischun. Cunquai che Scuol saja ina destinaziun da renum naziunal ed internaziunal na possia en il cas da Scuol betg vegnir exclus, ch’er Scuol saja pertutgà, scriva la regenza grischuna.

Scuol responsabel ch'ils 1'000 francs vegnan al dretg lieu

La regenza fa dentant la segira cun render attent, ch’ella pretendia er da Scuol d'intervegnir «tar ils organs da campagna privats e da garantir ch'ils meds publics ch'ella metta a disposiziun vegnian utilisads confurm a l'intent e che l'objectivitad e la discreziun vegnian resguardadas sco pretendì.» En pli renda ella attent, ch’ins na stoppia betg partir dal fatg, che «questas contribuziuns hajan in’influenza relevanta sin il resultat da votaziun».

Uss recurra il recurrent cunter la decisiun da la regenza

Curt suenter che la regenza ha publitgà la mesemna sia decisiun ha er reagì il recurrent, Urs Trottmann da Scuol: «Jau paj mias impostas qua a Scuol e na less betg, che quellas vegnian impundidas per inserats e placats a favur da la candidatura grischuna per l’olimpiada 2026».

L’interess da Scuol saja massa pac evident, scriva el en sia communicaziun a las medias, e perquai vul el trair vinavant il recurs. Quel agir vegn sustegnì da la PS grischuna.

Gia dus ulteriurs recurs cunter donaziuns al cumbat electoral d’Arosa e San Murezzan eran vegnids refusads. Ils 12 da favrer ha il pievel grischun da decider sur d’in credit per ina candidatura grischuna per gieus olimpics il 2026.

RR novitads 12:00