Siglir tar il cuntegn

Chantun Enviern da record ha chaschunà aut privel da lavinas

Il bajetg dal SLF a Tavau.
Legenda: Cura ch'igl a dà navadas il schaner passà ha l'Institut per la perscrutaziun da naiv e da lavinas a Tavau annunzià per gronds territoris il privel da lavinas il pli aut – stgalim 5. Keystone
  • Excepziunalmain blera naiv ha chaschunà l'enviern 2017/18 aut privel da lavinas e numerusas lavinas.
  • L'Institut per la perscrutaziun da naiv e lavinas a Tavau ha suenter 19 onns puspè annunzià per gronds territoris il privel da lavinas il pli aut - stgalim 5.
  • Ultra da quai hai dà il pli chaud schaner dapi il cumenzament da las mesiraziuns avant 150 onns.

En lieus sur 1500 meters sur mar è l'enviern passà stà in dals envierns cun la pli blera naiv dals ultims 30 onns. Quella naiv ha chaschunà per in aut privel da lavinas e per numerusas lavinas. Sut 1000 meters sur mar hai dentant dà mo mez uschè blera naiv sco en la media. Perquai ch'il schaner è stà uschè chaud hai surtut dà plievgia en la regiuns pli bassas. Quai scriva l'Institut federal per la perscrutaziun da naiv e lavinas (SLF) en ses rapport da stagiun.

Fin 5 meters naiv en ils auts

Naivì intensivamain hai il november, december e surtut il schaner. En ils auts hai dà la fin da december fin ils 23 da schaner tranter 2,5 e 5 meters naiv. Il pli bler hai navì en il Vallais ch'è uschiglio plitost sitg. Las staziuns da mesiraziun a Saas Fee e Zermatt han registrà las pli grondas summas da naiv nova dapi 70 onns.

Pli aut privel da lavinas

Per ils 22 da schaner ha il SLF l'emprima giada dapi il 1999 proclamà il pli aut privel da lavina e quai sin gronda surfatscha. Sur tut en il Vallais ed en il Grischun èn pliras grondas ed er fitg grondas lavinas idas giu. La naiv umida en autezzas medias ha per cletg pudì franar las lavinas dals auts, uschia che nagins abitadis èn stads pertutgads. Mortas en lavinas èn l'enviern passà 26 persunas. En tut ils cas eran quai sportists d'enviern.

Tuttina è la situaziun da lavinas stada pli pauc precara ch'il favrer dal 1999. Quella giada era, durant 30 dis avant la perioda da lavinas, crudà in terz dapli naiv che quest onn. Ultra da quai avevi navì fin en regiuns pli bassas ed ils donns da lavinas èn stads marcantamain pli gronds il 1999.

RR novitads 11:00