Siglir tar il cuntegn
Inhalt

Chantun Enrico Netzer è daventà campiun europeic

72 bostgers han cumbattì per il titel da campiun europeic. Enrico Netzer ha dumagnà sia finamira.

In che sto far il tagl da precisiun
Legenda: Vid il tagl da precisiun RTR, Ursin Lechmann

Gia il venderdi ha Enrico Netzer gì bun success da pinar laina. El ha duvrà tschintg secundas per 30 roms. Quai è stà il start da sia buna seria al campiunadi. Er la sonda èsi ì enavant sumegliantamain. E la finala ha Enrico Netzer pudì ir per il titel. Da 72 participants or da 18 pajais è el uss il victur.

Donn è ch'il titel n'ha betg tanschì er per la naziun. L'Austria ha pudì batter la Svizra. En las disciplinas tecnicas sajan els stads megliers.

Las tschintg disciplinas:

  • Tagl da pinar: Ina planta duai vegnir pinada aifer 90 secundas uschè datiers sco pussibel d’ina direcziun definida en ina distanza da 15 meters. I sa tracta qua be d’in bloc e betg d’ina planta entira.
  • Midar chadaina: Tar ina resgia a motor vegn prendida davent la garnitura da tagl, vulvida la rodaglia e midada la chadaina uschia, ch’ins po duvrar la resgia a motor per las duas disciplinas che suondan senza stuair midar insatge vid la resgia.
  • Tagl cumbinà: Da dus bists da plantas vegnan tagliadas davent duas rudellas da lain. Quellas dastgan esser tranter 30 ed 80 mm. Qua ston ins l’emprim resgiar fin entamez il bist da sutensi e lura tagliar atras da surengiu. Pli exacts ch’ins è e pli blers puncts ch’ins survegn.
  • Tagl da precisiun: Da dus bists da plantas vegnan tagliadas davent duas rudellas da lain. Quellas dastgan esser tranter 30 ed 80 mm. La finamira è da tagliar atras il lain da surengiu senza che la platta da lain sin la quala ils bists schain vegn donnegiada da la resgia a motor.
  • Sromar: 30 lains pitgads viaden sco roma d’ina planta en in bist ston vegnir sromads cun la resgia a motor uschè spert sco pussibel senza ch’i varga ora anc in toc dal rom or dal bist.

RR actualitad 07:00