Siglir tar il cuntegn
Inhalt

Chantun Ennavar las pistas a Mustér è uss pussaivel

Las pendicularas e las organisaziuns per la protecziun da l'ambient èn sa cunvegnidas. E la regenza grischuna ha communitgà d'avair approvà ina revisiun parziala da la planisaziun locala.

La palì che ha chaschunà grondas discussiuns tranter las pendicularas, il WWF e la Pro natura.
Legenda: La palì che ha chaschunà grondas discussiuns tranter las pendicularas, il WWF e la Pro natura. mad

Suenter lungas discussiuns han il WWF, la Pro natura e las pendicularas chattà ina pussaivladad che lubescha vinavant da far ina pista sur ina palì protegida. Quai scrivan las partidas involvidas.

Sco il directur da las Pendicularas Mustér, Rudolf Büchi ha ditg ad RTR è l’approvaziun da la planisaziun locala impurtanta ord dus motivs. Per l’ina hajan ins cun la revisiun da la planisaziun locala la basa legala per realisar il project d’innovaziun e per l’autra saja entras la cunvegna cun las organisaziun d’ambient cler tge che saja pussaivel da far en il territori da skis e tge betg.

Cumpromiss che fan mal

Las pendicularas èn tranter auter s'obligadas da tegnair pitschnas las surfatschas da pista en la regiun da la palì e guntgir ils lieus sensibels. Plinavant na dastga betg vegnir stuschà dals urs naiv sin pista ed i sto aviar avunda naiv per insumma dastgar far pista. In cumpromiss che fa mal a las Pendicularas Mustér e chaschunia custs, declera Rudolf Büchi vinavant. Las maschinas da pista ston numnadamain vegnir equipadas cun apparaturas da GPS per pudair tegnair en questa cunvegna.

La cunvegna lubeschia ina pista cun resguardar la protecziun da palids autas ch’è francada dapi 1987 en la constituziun federala, da quai è Anita Wyss dal WWF persvadida. Il territori vegni surveglia ils proxims onns per pudair giuditgar che la pista sa cumporta cun las palids. Las organisaziuns d'ambient avevan numnadamain fatg recurs suenter l'approvaziun da la revisiun parziala da la planisaziun locala entras il pievel da Mustér l'atun 2015.

Las pistas ch'èn previsas d'ennavar en il territori da skis da Mustér.
Legenda: Las pistas ch'èn previsas d'ennavar en il territori da skis da Mustér. mad

Cumenzar primavaira

Gievgia ha la regenza grischuna communitgà ch'ella haja approvà la revisiun parziala da la planisaziun locala. Ussa possian ins inoltrar la dumonda da baghegiar per l'emprma etappa d’ennavar, tranter Caischavedra e Gendusas. Sco Rudolf Büchi di vinavant saja quintà da cumenzar cun las lavurs proxima primavaira e da pudair metter en funcziun ils indrizs d’ennavar sin quest tschancun la stagiun d’enviern 2018/19.

Previs èn indrizs per ennavar ina surfatscha da bun 26 hectaras, quai che correspunda a bun 11 kilometers pista. Igl è planisà da realisar ils indrizs entaifer 10 onns en quatter etappas.

RR novitads 12:00