Siglir tar il cuntegn

Chantun Engler: «Jau na savev da nagut»

L'anteriur schef dal departament da construcziun, traffic e selvicultura dal Grischun, Stefan Engler, na saveva nagut da las cunvegnas da pretschs ch'èn vegnidas fatgas tar la branscha da construcziun en l'Engiadina.

Legende: Video Stefan Engler: «Jau n'hai savì da nagut» abspielen. Laufzeit 02:00 Minuten.
Or da Telesguard dals 27.04.2018.

Tenor las retschertgas dal magazin online «Republik» è dentant l'Uffizi da construcziun bassa e ses schef da lura, Reto Knuchel, vegnì infurmà ch'i dettia cunvegnas da pretschs. Sco quai che Stefan Engler ha ditg ad RTR, na saja el betg vegnì infurmà lura da Knuchel. L'administraziun chantunala haja era sias reglas davart la relevanza da tschertas dumondas, daco ch'el na saja betg vegnì infurmà, na possia el betg dir, uschia di l'anteriur cusseglier guvernativ da la PCD. I deva forsa motivs ed arguments pertge ch'il schef da l'uffizi da construcziun bassa ed er il schef dal district Engiadina Bassa n'hajan betg infurmà el sco schef dal departament. El possia sulet specular dals motivs ch'el na saja betg vegnì infurmà.

Jau sun plitost unfrenda che d'avair gì activamain ina rolla da savair insatge senza intervegnir.
Autur: Stefan EnglerCusseglier dals chantuns

L'onn 2003 haja il chantun er gì indizis sin probablas cunvegnas da pretschs, raquinta Engler. Lura haja ses departament ord atgna iniziativa pretendì da la WEKO in'examinaziun che saja lura vegnida sistida il 2005 senza resultats concrets. Quai demussia dentant ch'il chantun ed er el sco persuna hajan interess d'examinar da quai sch'i dettia indizis.

Engler reponderescha sia posiziun tar l'interpresa Lazzarini

Stefan Engler è er president dal cussegl d'administraziun da l'interpresa da construcziun Lazzarini SA. Lezza è vegnida chastiada gia il mars per l'emprima giada pervi da cunvegnas da pretschs. Er questa giada è Lazzarini culpanta. La firma saja sa mussada cooperativa e portia las consequenzas da quests cas, uschia di Engler. Il mument saja d'examinar il cas ed il chasti actual e suenter pondereschia el sch'el restia vinavant en il cussegl d'administraziun. I saja er da proteger la Viafier retica e ses post sco cusseglier dals chantuns.

RR novitads 14:00