Siglir tar il cuntegn
cuntegn

Chantun Energia idraulica è cumpetitiva e rentabla

In studi che la cuminanza d'interess da las vischnancas concessiunarias dal Grischun ha dà en lavur mussa sin basa da datas ord in'expertisa che l'energia d'aua è - auter che pretendì dad ovras electricas- cumpetitiva e rentabla.

Legenda: Guardar il video Nov studi mussa che l'energia idraulica è rentabla. Durada 03:57 minutas.
Or da Telesguard dals 12.06.2017.

I na saja betg necessari da sbassar ils tschains d'aua, quai è il facit dal studi da la firma re-solution da l'anteriur cusseglier naziunal Rudolf Rechsteiner.

Il studi mussa che l'energia idraulica custa en media pli pauc che pretendì da las ovras electricas: Numnadamain betg 7 raps per ura kilowatt mabain be 4,9 raps. Energia atomara saja dentant cun tranter 5,6 raps ed 8,5 raps pli chara.

Dapli transparenza

Perquai pretendan las vischnancas concessiunarias dapli transparenza puncto custs. Las ovras zuppentian ch'ellas hajan anc adina grondas marschas sin l'energia d'aua, quai grazia a clients liads, commerzi e l'export d'electricitad.

D'in tut auter avis èn ils concerns d'electricitad gronds e l'uniun per l'economia d'aua svizra. Els pretendan che l'energia idraulica è deficitara ed ils tschains d'aua stoppian perquai vegnir sbassads per 60%.

Sper quai pretenda Not Carl, il president da la cuminanza d'interess, che la valur da l'energia idraulica è bler pli granda che quella d'energia solara u energia da vent, cunquai ch'ins po accumular ella. Ins pudess far reservas strategicas en ils lais da fermada e producir l'energia lura cura ch'i dovra ella.

Anc per quest mais ha il Cussegl federal empermess la consultaziun davart il messadi en connex cun ils tschains d'aua.

Reacziun da la Repower

Las firmas grondas d'electricitad survegnessan entras questas propostas dapli regulaziuns vid las qualas ellas stuessan sa tegnair. Perquai è la Repower in zic sceptica. Anc uss saja la flexibilitad fitg granda tar l'energia idraulica, entras la proposta da far reservas dess quai dapli regulaziuns e dapli birocrazia per las firmas d'electricitad, uschia Werner Steinmann il plidader da medias da la Repower.

RR novitads 11:00