Siglir tar il cuntegn
cuntegn

Chantun En la trapla dal curs da l'euro

Economs crajan ch'il Grischun na vegnia a lunga vista betg a pudair far auter che da s'orientar da nov cun si'economia. Il chantun saja confruntà cun sfidas considerablas, uschia il fazit dals economs da la banca Credit Suisse che han prendì sut la marella il Grischun.

Vista sin la Vallada dal Rain grischuna
Legenda: Vista sin la Vallada dal Rain grischuna, la suletta vallada cun in tschert potenzial da qualitad dal lieu. Keystone

Il turissem, l'industria d'export, l'energia ed il commerzi en detagl èn ils secturs economics centrals dal Grischun. Il problem saja che gist questas branschas reageschian ordvart sensibel sin turbulenzas dals curs da stgomi. 53% dals exports e 32% da las pernottaziuns èn derivadas l'onn passà da la zona da l'euro.

La branscha da construcziun ha da sbatter cun las consequenzas da l'iniziativa d'abitaziuns secundaras, tut tenor la regiun èn las dumondas da bajegiar sa reducidas per fin 60%.

Vallada dal Rain - la regiun da boom

En connex cun la qualitad dal lieu dattan ils economs da la CS al Grischun la nota «sut la media». Sco suletta excepziun vegn numnà la Vallada dal Rain grischuna che ha bunas colliaziuns cun ils centers economics ordaifer il chantun.

La Vallada dal Rain u la regiun gronda da Cuira, è era il motor dal creschament da la populaziun. Tranter l'onn 200 e 2014 è la populaziun en questa regiun creschida sco en la media svizra.

Attractiv èn las taglias

En bleras autras regiuns è il dumber da la populaziun stagnà u sa sminuì. Intginas regiuns a la periferia han da cumbatter cun la depopulaziun, scrivan ils economs da la Credit Suisse. Sco «attractiv sur la media» vegn numnà il Grischun ord vista da la taglia. Era renconuschidas vegnan las refurmas ch'èn vegnidas realisadas u lantschadas l'ultim temp per mitigiar la flaivlezza structurala. Numnadas vegnan per exempel la refurma dal territori u l'adattaziun da la gulivaziun da finanzas.

RR novitads 17:00