Siglir tar il cuntegn
cuntegn

Chantun En il Grischun lavuran dapli fugitivs ch'en la media svizra

En il Grischun lavuran dapli fugitivs e persunas admessas provisoricamain ch'en la media Svizra. Per la regenza è quai tranter auter l'effect dal concept d'integraziun.

fugitivs che lavuran tar in bain puril
Legenda: En il Grischun lavuran dapli fugitivs e persunas admessas ch'en la media svizra. Keystone

La fracziun socialdemocratica ha dumandà la regenza en in'incumbensa sche l’agid social per fugitivs pudessi vegnir remplazzà cun dar lavur a requirents d’asil.

En sia resposta scriva la regenza ch'ella veglia cuntinuar cun las fadias. Tranter auter vul ella examinar ulteriuras pussaivladads d'occupaziun per ils fugitivs ed era examinar in'access pli simpel a fufragnadis.

Il chantun vul er examinar ulteriuras simplificaziuns nua che quai è pussaivel, p. ex. areguard impediments administrativs existents, concernent la renconuschientscha da diploms esters e concernent la validaziun da prestaziuns da furmaziun e chaussas sumegliantas.

Promover e pretender

L'agid dal chantun sa basa sin quest principi. La finamira p. ex. da la purschìda da curs da lingua che tegna quint da las differentas premissas da furmaziun è quella da meglierar las cumpetenzas linguisticas en vista ad ina promoziun d'ina integraziun professiunala svelta. Cun il sustegn da jobcoachs scolads vegnan persunas adattadas ed ablas da lavurar intermediadas activamain en praticums da 3 fin 6 mais en las branschas las pli differentas, nua ch'ellas pon s'acquistar experientschas professiunalas sin il martgà da lavur e nua ch'ellas pon prender ina decisiun davart ina carriera professiunala cun cumenzar ina tscherta activitad da gudogn.

Sin basa d'ina examinaziun fatga l'avrigl 2016 vul il chantun promover talas purschidas, cunzunt uschènumnads emprendissadis preliminars.

RR novitads 12:00