Siglir tar il cuntegn

Chantun En il Grischun è cumprovada la pesta da chauns tar vulps

Sco quai che l'uffizi da chatscha e pestga communitgescha, hajan ins constatà e cumprovà il virus tar numerusas vulps en la Val dal Rain da Cuira, da Tavau e da la Mesolcina.

Vulp en la natira.
Legenda: Virus è vegnì cumprovà tar vulps en la Val dal Rain da Cuira, da Tavau e da la Mesolcina. ©Karl-Heinz Jäger

Ils animals pertutgads sajan vegnids grevamain malsauns pervi da l'infecziun virala ed han stuì vegnir sajettads u èn vegnids chattads morts. Il virus da la pesta da chauns è fitg contagius ed è er gia vegnì cumprovà en il chantun Son Gagl ed il Principadi da Liechtenstein.

Virus fitg contagius

La pesta da chauns è in virus che spezialmain chauns ed uschenumnads mustailids (chaun, vulp, tais, fiergna, telpi, mustaila) survegnan. Il virus è fitg contagius e per regla moran ils chauns da la malsogna. Il virus vegn dà vinavant tras in contact direct cun l'animal infectà u indirect tras aua, pavel u chaussas ch'èn contaminadas cun secret da l'animal malsaun.

Che chauns èn vegnids infectads da selvaschina n'han ins fin uss betg constatà. Ins na po dentant betg excluder quai. Als possessurs da chauns vegn cusseglià da laschar virolar lur chaun cunter la malsogna. Per carstgauns n'exista nagin privel.

Il 2009/2010 pesta da chauns en l’Engiadina Bassa

La davosa giada ha il virus fatg la runda avant otg, nov onns sin il territori grischun. Là èn, tenor Adrian Arquint, mortas bunamain la mesadad da las vulps da l’Engiadina Bassa. Dus onns pli tard saja il dumber dentant puspè stà sin il stan dad avant, agiunscha l’inspectur da chatscha grischun. Quantas vulps che vegnan questa giada a murir na poss’ins anc betg predir.

RR novitads 09:00