Siglir tar il cuntegn

Header

Navigaziun

ina dunna vid referir
Legenda: La professura Henriette Dausend durant ses referat davart l'instrucziun transcurriculara. RTR, Hugo Schär
cuntegn

Chantun Emprender ina lingua sur il cunfin linguistic e cultural

«Instrucziun transcurriculara ed interculturala» è in dals models per instruir ina lingua en scola ch'è vegnida preschentada a la dieta Convegno 2016. La dieta è in inscunter da diversas scolas autas da pedagogia e sa fatschenta en spezial da la plurilinguitad e l'instrucziun da lingua en scola.

La problematica da l'instrucziun da lingua sco er las dumondas actualas (Duai dar ina u duas linguas estras en scola? Cura cumenzar cun l'englais? u Tge è ina buna instrucziun da lingua) occupan adina puspè ils experts da lingua.

Quest onn s'inscuntran radund 100 linguists, docents, magistraglia da pliras scolas autas da pedagogia svizras ed era inspecturs da scola al «Convegno 2016» per brattar lur experientschas.

Transcurricular, immersiv e biling

A la dieta vegnan preschentads divers concepts e models per ina instrucziun da lingua effectiva ed effizienta. Quest onn stat la dieta sut il focus da la metoda transcurriculara ed interculturala.

La professura Henriette Dausend da l'universitad da Chemnitz ha preschentà questa metoda. En ses referat ha ella declerà sin tge principis d'instrucziun ch'il model sa basa e co l'instrucziun ves'ora en la pratica. Igl è in principi che vul trair a niz las differentas linguas e culturas ch'existan ozendi savens en las classas da scola primara.

Il model fa er diever da las experientschas da l'instrucziun bilingua ed immersiva. Cun la metoda transcurriculara duai vegnir intensivà l'emprender ina lingua estra en la scola primara.

Sper quest referat datti er differents ateliers nua che auters projects da lingua vegnan preschentads. Ultra da quai ha ina classa da la scol'auta da pedagogia er preschentà in toc da teater pluriling: «Il lungatg da l'emprim'amur», in teater nua che betg main che diesch differentas linguas vegnan discurridas.

RR actualitad 07:00

Convegno 2016

Convegno è l'inscunter da las scolas autas da pedagogia dal Tessin, Vallais e Grischun. Igl è ina dieta da plurilinguitad ch'i dat mintga dus onns. Suenter Ascona il 2012 e Brig il 2014 è la dieta questa giada en il Grischun, a Cuira.