Enconuschent è era che la Societad Retorumantscha vul spustar l’elecziun dal nov president per eventualmain anc avair auters candidats. I para ch'i dat motivs per tschertgar auters candidats.
En discurs cun differents exponents da la Rumantschia èn sa cristallisads ora, sper dumondas da la procedura, trais motivs principals per spustar l’elecziun.
L’emprim motiv che discurra per in auter candidat u in’autra candidata è la persuna da Johannes Flury. El vegn dal Partenz, ina regiun tudestga, ed ha emprendì rumantsch. Per tschertins èsi curios ch’i na dat sco ch'i para nagin candidat propi oriund da la Rumantschia. Auters èn da l'opiniun ch’i duvrass ina persuna pli giuvna (Flury è pensiunà) e che Flury na saja betg exnum adattà per manar in' instituziun (istorgia cun l'Institut Otalpin a Ftan).
Il segund motiv per in auter candidat u in’autra candidata: Il secretari general da la Lia, Urs Cadruvi è da la PLD, il president partent Duri Bezzola è da la PLD ed era Johannes Flury è commember da la Partida liberaldemocratica. La PLD, che stat per pli pauc stadi, a la testa da la LR ch’è fermamain dependenta dal stadi? Quai procura per ulteriurs dubis.
E lura datti anc in terz motiv per spustar l’elecziun. La chanceliera federala Corina Casanova n'ha betg ditg na ad ina candidatura, vul u dastga dentant betg s’exprimer uschè ditg ch’ella è anc en uffizi enfin la fin da l' onn. Ella fiss per bleras da las persunas contactadas la candidata ideala perquai ch’ella haja connex tant cun la Surselva, sco er cun l'Engiadina, haja ina buna rait naziunala e fiss anc l’emprima dunna en quest post.
«Na sun betg cuntracandidat»
Cura ch'el saja vegnì dumandà da la Lia Rumantscha sch'el fissi pront da surpigliar il presidi, haja el dà per risposta ch'el saja in dal Partenz e ch'el haja emprendì rumantsch. El sa mettia a disposiziun sche la Rumantschia veglia quai, di Johannes Flury. El haja ditg davent da l'entschatta ch'el na saja betg in cuntrarcandidat. Sche la Rumantschia haja ina persuna da num e da pum che veglia surpigliar il post lura na stettia el betg a disposiziun. Era sch'i vegniss decidì da spustar l'elecziun, per exempel sin l'auter onn primavaira u stad, lura saja era cler ch'il chapitel «president da la Lia Rumantscha» saja terminà per el.
Partida na gioga nagina rolla
Pertutgant sia commembranza en la Partida liberaldemocratica e ch'il secretari general da la Lia, Urs Cadruvi, sco er il president actual, Duri Bezzola, èn medemamain commembers da la PLD, na vesa Flury nagin problem. I na saja betg decisiv en quest post d'esser in politicher u ina politicra, i fiss dentant in avantatg sch'il president u la presidenta da la Lia sappia co che la politica funcziunia.
Johannes Flury ha era menziunà ch'el chapeschia ch'i dettia uss in pau discussiuns pervi da sia persuna e ch'i detti era dubis. Quests dubis sajan dentant ussa da metter sin maisa e lura possia quai dar ina decisiun, uschia di Flury.