Tgenina partida gudogna ils pli blers sezs en il cussegl grond? Tgi dals 7 candidats vegn (re-)elegì en la regenza? Quai decida il suveran grischun ils 18 da matg.
Al podi d'elecziuns han Radiotelevisiun Svizra Rumantscha, Südostschweiz Medien e Schurnal regiunal Grischun piglià la marella enta pugn ed envidà candidatas e candidats, e las direcziuns da las partidas. Els ed ellas han dà pled e fatg.
L'arranschament è vegnì emess live sin las paginas da RTR ed SO - en discussiun via Twitter (@RTRSRG) cun il hashtag #GR14 - ed è qua per guardar anc ina giada.
Ils resultats da la retschertga
Il manader da la perscrutaziun da politica da l'institut Demoscope, Werner Reimann, preschenta ils resultats.
L'analisa dals schefredacturs
Cun moderaziun da Silvio Liechti (SRF) han ils schefredacturs Gian Ramming (RTR) e David Sieber (SO) d'analisar ils resultats.
4 «anteriurs» vulan anc ina giada
Ils anteriurs commembers da la regenza che recandideschan Barbara Janom Steiner (PBD), Mario Cavigelli (PCD), Christian Rathgeb (PLD) e Martin Jäger (PS) dattan pled e fatg ad Otmar Seiler (RTR) e Silvana Giger (Radio Grischa) .
La runda d'elefants
Las direcziuns da las partidas: Andrea Davaz (PPS), Andreas Felix (PBD), Stefan Engler (PCD), Jon Pult (PS), Christian Stricker (PVL), Michael Pfäffli (PLD) ed Angelo Andina (Verds) davart lur finamiras e strategias. Ils manaders da las partidas. Quai en la zanga da Stefanie Hablützel (SRF), Larissa M. Bieler (BT) e Valentin Schmed (RTR).
3 novs vulan era
Pertge ch'i vulan en la regenza decleran ed argumenteschan Heinz Brand (PPS), Jon Domenic Parolini (PBD) e Jürg Kappeler (PVL) vers Nadja Cadonau (RTR) e Reto Furter (SO).