Cunquai che quatter dals sis candidats per la regenza – Jon Domenic Parolini, Christian Rathgeb, Mario Cavigelli e Walter Schlegel – sajan involvids en l'affera davart cartels en la branscha da construcziun propona il president da la Partida verd-liberala grischuna, Gaudenz Bavier, da spustar las elecziuns dals 10 da zercladur. Questa situaziun chaschuna tenor Gaudenz gronda malsegirezza en la populaziun. Fin ch'ils fatgs na sajan betg sin maisa na duessi betg dar elecziuns, scriva Gaudenz Bavier en sia brev da lectur ch'è publitgada en las gasettas Südostschweiz e Bündner Tagblatt.
Fin che l'entira istorgia na saja betg cleramain refundida na duessi betg dar elecziuns.
Dapli che be in delict da chavalier
Bavier è da l'avis ch'ins stuess spustar las elecziuns per in onn. Sco el di, sustegnan er autras persunas sia proposta da spustar las elecziuns. I marschian anc adina inquisiziuns e bler na saja anc betg sclerì e cler. In spustament da las elecziuns dess dapli temp e purtass in zichel ruaus en il cumbat electoral.
Constituziun na lubescha betg da spustar las elecziuns
Tenor indicaziuns dal substitut da la chanzlia chantunala, Walter Frizzoni, n'èsi tenor la constituziun betg pussaivel da spustar las elecziuns sin l'auter onn. La lescha pussibilitescha be da guntgir dals termins da votaziun tenor lescha – per regla il matg u zercladur per la regenza il prim da schaner da l'onn suandant - ord motivs da gronda muntada. La perioda d'uffizi dals commembers da la regenza actuala finescha dentant ils 31 da december 2018. Pia sto l'elecziun obligant avair lieu il 2018. In spustament sin 2019 fiss cuntrari a la constituziun.
RR novitads 06:00
