Tenor lescha dastga il material da votar arrivar tar ils votants il pli baud quatter emnas avant la votaziun. Per las elecziuns e votaziuns dals 10 da zercladur, fiss quai stà ils 13 da matg. Quai è l'incumbensa da las vischnancas. Els ston far attenziun e retegnair ils termins. Sch'il material vegn repartì memia baud, ha la chanzlia chantunala da discutar il cas.
Las brevs èn dentant tuttina valablas, era sch'ellas arrivan memia baud en chasa. «Subit ch'ins survegn il material, pon ins vuschar», di Walter Frizzoni, il vicepresident da la chanzlia chantunala. Subit ch'ins ha dà giu la vusch na pon ins però betg pli midar opiniun.
Küblis e Zuoz memia motivads
En omaduas vischnancas han ils abitants survegnì il material electoral memia baud. A Küblis ils 10 da matg ed a Zuoz gia ils 7 da matg. La vischnanca da Küblis di dentant, ch'els avevan gist temp per preparar las brevs. Gia ils 3 da matg hajan els miss las chartas sin posta. Uschè eran els baud avunda per trametter las brevs sco spediziun gronda.
Claudio Duschletta, il chanzlist da Zuoz di dentant, ch'els hajan probabel fatg confusiun cun las datas. Perquai hajan els tramess las brevs memia baud. El na vesa dentant nagin problem pervi da quai. «Probabel n'ha nagin gia votà ils 7 da matg», di Durschletta.
Bardill pudess purtar plant
Linard Bardill ha annunzià sia candidatura ils 8 da matg. Ils da Zuoz avevan survegnì il material d'eleger gia in di avant. Dimena: Tar quels che han spert vuschà ils 7 da matg n'aveva Bardill nagina schanza da survegnir la vusch. Cunter quai pudess el purtar plant. Tenor Walter Frizzoni, po mintgin annunziar irregularitads tar il post responsabel dal Cussegl grond. «Pervi da brevs ch'èn arrivadas memia baud, n'haja quai dentant anc mai dà plant.», uschè Frizzoni.
RR actualitad 07:00