Dapi emnas surrian candidatas e candidats giu da placats en l'entir Grischun. Questa dumengia va il cumbat electoral a la fin – il Grischun elegia ina nova regenza ed in nov parlament.
Da set sin sis – e da sis sin set
Igl è stà in cumbat electoral turbulent. Las investigaziun da la cumissiun da concurrenza Weko han maschadà da nov las cartas. Il candidat da la PBD Andreas Felix è vegnì fermamain sut squitsch ed è la finala sa retratg en la cursa per in sez en la regenza. Igl è dentant betg restà tar ils sis candidats Mario Cavigelli (PCD), Jon Domenic Parolini (PBD), Christian Rathgeb (PLD), Marcus Caduff (PCD), Peter Peyer (PS) e Walter Schlegel (PPS). Il chantautur da Scharans Linard Bardill (independent) è sa decidì da candidar ed ha uschia purtà colur en il cumbat electoral grischun. Uschia ha il pievel grischun la schelta tranter set candidats.
Roschada en il Cussegl grond
Circa in terz da las deputadas ed ils deputads dal parlament grischun demissiunescha, uschia che novas fatschas emprovan da recaltgar in sez. En tut han bunamain 170 persunas interess vid in mandat en il Cussegl grond. La PBD sto remplazzar la mesadad da lur candidats. Era tar las duas grondas fracziuns en il Cussegl grond datti midadas. Mintgamai 10 deputadas e deputads dattan giu lur mandat.
RR novitads 06:00