Siglir tar il cuntegn

Header

Navigaziun

Logos da partidas sin artitgels da reclama.
Legenda: Keystone
cuntegn

Elecziuns 2019 Bleras midadas – auter ch'en las bastiuns da la PCD

Las fermezzas da las partidas en il Grischun tar elecziuns dal cussegl naziunal èn sa midadas, ma la PCD ha pudì mantegnair sias duas bastiuns en la Surselva ed il Surses.

In motiv per la fermezza constanta dals Cristiandemocrats en la Surselva ed il Surses saja segir la confessiun, declera il politolog Clau Dermont:

Sche la glieud, che s'engascha en ina u l'autra furma, è tutta da la medema partida è quai sco en la DNA, e resta lura er uschia.
Autur: Clau Dermontpolitolog

En la Surselva è Vuorz la suletta vischnanca ch'è mai stada en ils mauns da la PCD. Era qua è il motiv la confessiun: Ins na veglia betg exnum eleger la medema partida sco las vischnancas vischinas. Fitg interessant saja dentant che la PPS e la PS hajan alternativamain gì la maioritad en la vischnanca.

Quai vul dir, che quels da Vuorz èn fitg averts e pronts da guardar, tge che autras partidas porschan.
Autur: Clau Dermontpolitolog

En la gronda part da las vischnancas saja dentant uschia, che tut las partidas hajan ina pussaivladad da dominar. I dependia dentant er da la campagna e las persunas che vegnan tramessas en la cursa.

PPS reconquista vischnancas da la PBD

Sco en l' entira Svizra è la PPS ferma era en il Grischun. Motiv per quai saja ch'ina part da las ragischs da la partida saja er en il Grischun – quai valia oravant tut per l'ala democratica. Suenter che quella è sa spartida da la PPS sco PBD haja quai er midà las fermezzas en il Grischun.

La PPS è dentant sin via da reconquistar las forzas da la PBD.
Autur: Clau Dermontpolitolog

Gist tar las davosas elecziuns possian ins vesair che la PPS haja puspè gudagnà suramaun en bleras vischnancas da la PBD.

Er en las valladas talianas ha la partida dretga pudì gudagnar electurs il 2015 – là nua che dominavan PCD e PS. Probabel haja quai da far cun la politica da l'exteriur taliana, suppona il politolog.

Verd-liberals han flaivlentà liberals

Tradiziunalmain èn ils liberals adina stads ferms en l'Engiadin'Ota, en las regiuns da Cuira ed a Flem. Daventada pli flaivla è dentant er la PLD. Dad ina vart haja il cumbat tranter PPS e PBD era influenzà ils liberals. Da l'autra vart hajan ils verd-liberals dumagnà da gudagnar in sez en il Cussegl naziunal avant otg onns.

Ins percorscha ch' ina partida fa menders resultads, sch'ella n'ha betg in candidat anteriur.
Autur: Clau Dermontpolitolog

Socialdemocrats verds

Quai che pertutga las partidas da la sanestra en il Grischun è la PS la pli ferma. Tradiziunalmain ha quella electurs oravant tut en las regiuns urbanas sco a Cuira. La Verda è fin uss restada flaivla. Ma er per quai datti in'explicaziun:

En il chantun Grischun sajan ils socialdemocrats ditg e lung era stads ils verds. Andrea Hämmerle u Silva Semadeni sajan per exempel persunalitads che sajan adina er sa profilads cun tematicas da l'ambient. Uschia sajan els stads ils verds dal chantun Grischun er sch'els hajan candidà sco socialdemocrats, declera Clau Dermont. Vitiers vegnia, ch'i saja en in chantun conservativ plitost grev da s'etablir sco segunda partida sanestra.

RR actualitad, 12:00