Siglir tar il cuntegn

Chantun Elecziuns 2015 - Pigniu va sut

Da las 178 vischnancas che han elegì il 2011 ils parlamentaris grischuns per la chasa federala a Berna, restan il 2015 mo pli 125. Suenter grondas fusiuns sa chattan singulas vischnancas pitschnas cun ina tenuta politica tradiziunalmain plitost dad in maun dal spectrum politic tuttenina da l’auter.

pigniu
Legenda: Vista sin il vitg da Pigniu. RTR

Or da vischnancas dretgas vegnan sanestras e viceversa.

Ils da Pigniu han elegì il 2011 plitost da vart dretga dal spectrum politic. Da las vuschs da Pigniu èn idas 60 % a la Partida populara svizra (PPS). La Partida socialdemocrata (PS) da l’autra vart dal spectrum n’ha survegnì naginas vuschs dals vischins da la pitschna (anteriura) vischnanca en Surselva.

Dapi l’entschatta dal 2015 tutga Pigniu tar la nova vischnanca fusiunada Ilanz/Glion. Summesch’ins ils resultats da tut las fracziuns dad Ilanz/Glion (Castrisch, Glion, Ladir, Luven, Pitasch, Riein, Ruschein, Schnaus, Sevgein, Duvin, Pigniu, Rueun, Siat) sche sa mussa in maletg different. Sco vischins da la vischnanca fusiunada Ilanz/Glion tutgan ils da Pigniu tar ina vischnanca ch’avess elegì il 2011 cun 36,8 % da las vuschs la Partida cristiandemocratica (PCD) sco la pli ferma partida. La PPS fiss vegnida mo sin 19 % da las vuschs.

Faschai in clic sin ina vischnanca politica sco ella existiva anc uffizialmain il 2011 per vesair il resultat da la nova vischnanca fusiunada.

Unda da fusiuns grondas suenter 2011

L’unda da fusiuns pli grondas ch’è ida atras il Grischun suenter il 2011 chaschuna resultats sumegliants a quel da Pigniu en Surselva per autras vischnancas pli pitschnas. Guarda per exempel vegn entaifer la nova vischnanca fusiunada da Scuol maiorisada da vuschs pli dal center u da la sanestra. L’anteriura vischnanca da Guarda suletta ha dà il 2011 24 % da las vuschs a la PPS. Tut la nova vischnanca fusiunada avess dà a la PPS dentant mo 18,3%. Segund ferma partida da la vischnanca fusiunada da Scuol vegniss plinavant la PS. A Guarda sulet è la PS la terz ferma partida en las elecziuns dal cussegl naziunal dal 2011.

Or da cotschen daventa verd stgir

La via cuntraria – pia ina «midada» da sanester plitost a la dretga – va l’anteriura vischnanca da Lavin. Ils vischins da Lavin avevan dà il 2011 27% da las vuschs a la PS e 3.6% a la PPS. En lur nova vischnanca – dapi il 2015 tutga Lavin ensemen cun Susch e Zernez a la nova vischnanca da Zernez – sa chattan ils da Lavin dentant en cumpagnia da l’auter maun dal spectrum politic. La vischnanca fusiunada da Zernez avess dà il 2011 35% da las vuschs a la PPS e 12.8% a la PS.

Nagin effect sin elecziuns 2015

Sin las elecziuns dal cussegl naziunal han las fusiuns da vischnancas tgunsch nagin effect. Las vuschs da tut il chantun vegnan quintadas ensemen per guardar tge partida, respectiv colliaziun da glista ha da bun quants sezs.