Siglir tar il cuntegn
cuntegn

Chantun Elecziun president da regenza spustada

En la sessiun dal Cussegl grond ch'ha cumenzà il glindesdi fiss stà previs d'eleger il president da la regenza. Quai vegn dentant spustà, perquai che las vuschs da Jon Domenic Parolini – che vegniss londervi – e Walter Schlegel vegnan anc ina giada dumbradas.

Jon Domenic Parolini.
Legenda: Jon Domenic Parolini ha tar las elecziuns per la regenza fatg mo 68 vuschs dapli che Walter Schlegel. Keystone

Il mardi a bun'ura fiss stà previs en il Cussegl grond, d'eleger il president da la regenza 2019 e successur da Mario Cavigelli (PCD). Sco vicepresident actual vegniss Jon Domenic Parolini (PBD) en roda.

L'elecziun vegn però spustada sin la sessiun d'avust. Quai ha Martin Aebli, il president dal Cussegl grond, annunzià al cumenzament da la sessiun. Il motiv è, ch’il cusseglier guvernativ e vicepresident da la regenza, Jon Domenic Parolini, è vegnì reelegì sco cusseglier guvernativ cun mo 68 vuschs avantatg sin Walter Schlegel (PPS) e che las vuschs vegnan dumbradas anc ina giada. Perquai vegn il nov president da la regenza elegì pir, cura ch'il resultat definitiv da las elecziuns è avant maun.

Tar l'elecziun da Jon Domenic Parolini sco vicepresident avant in onn avevan bleras deputadas e deputads dà giu cedels vids.

Cussegl grond ha apprvà quint 2017

Il Cussegl grond ha approvà unanimamain il quint chantunal 2017. Quel mussa in gudogn da 78 milliuns francs e la ministra da finanzas Barbara Janom Steiner ha survegnì bler laud per avair enta maun las finanzas. Ella ha preschentà per l’ultima giada il quint en il Cussegl grond, damai ch’ella chala la fin da l’onn.

Janom Steiner ha dentant fatg attent ch’il quint saja uschè bun pervia dad entradas extraordinarias, cun las qualas ins na dastgia betg quintar mintg’onn – sco per exempel dapli daners da la Banca naziunala ubain ord la gulivaziun da finanzas da la Confederaziun.

Elecziuns, demissiuns, iniziativa e PUK

Per circa in terz da las 120 deputadas e deputads è la sessiun da zercladur l'ultima, damai ch'els han annunzià lur demissiun. Quai vala natiralmain era per politicras e politichers che n'èn betg vegnids reelegids.

Trais variantas per l'iniziativa per ina lingua en scola

La regenza e la cumissiun per furmaziun proponan al Cussegl grond da refusar l’iniziativa, tranter auter perquai che la pasch linguistica vegniss periclitada.

Ina minoritad da la cumissiun fa dentant ina cuntraproposta e la deputada Martha Widmer-Spreiter (PBD) propona ina terza varianta e vul spustar la debatta per in mez onn per pudair discutar sia nova proposta.

PUK – cun preschientscha da la regenza?

Mesemna decida il Cussegl grond sch'i duai dar ina PUK – ina cumissiun d'inquisiziun parlamentara che duai sclerir l'agir dal chantun en ils embrugls da cartels en l'Engiadina. La proposta da la cumissiun da gestiun, che la regenza dastga esser preschenta, na plascha insumma betg e vegn a dar discussiuns.

RR actualitad 12:00