Siglir tar il cuntegn

Header

video
2 lufs dal Calanda pon vegnir sajettads
Or da Telesguard dals 21.12.2015.
laschar ir. Durada: 3 minutas 26 Secundas.
cuntegn

Chantun Dus lufs dal Calanda dastgan vegnir sajettads

L'Uffizi federal d'ambient lubescha da sajettar dus lufs da la rotscha dal Calanda. Uschia duain ils ulteriurs lufs da la rotscha puspè vegnir pli timids ed evitar zonas abitadas. Ils chantuns Son Gagl e Grischun avevan dumandà sch’els dastgan sajettar ils dus lufs.

audio
Saira: 2 lufs dal Calanda pon vegnir sajettads
ord Actualitad dals 21.12.2015.
laschar ir. Durada: 1 minuta 35 Secundas.

Ils lufs dal Calanda ch’eran vegnids protocollads e valitads cuntinuadamain dals collavuraturs dals uffizis cumpetents dals chantuns Grischun e Son Gagl n'avevan ditg procurà per naginas situaziuns privlusas directas per l'uman. Ils ultims mais haja quai dentant dà pli e pli savens scuntradas a curta distanza tranter umans e lufs en u enturn ils abitadis, aveva il Departament da construcziun, traffic e selvicultura dal Grischun scrit la fin da november.

Betg pli uschè simpel da spaventar

Singuls u plirs lufs sajan schizunt s'avanzads fin a portas da stallas, a saivs da stallas libras u ad edifizis. Suenter plirs incidents tranter l’uman ed ils lufs, che na laschian er betg pli spaventar uschè simpel, han ils chantuns Grischun e Son Gagl valità il cumportament da la rotscha sco problematic e dumandà l’Uffizi federal d'ambient (UFAM) il permiss da sajettar dus dals lufs da la rotscha dal Calanda. Ils lufs duajan uschia vegnir puspè pli timids envers l'uman. Sajettar giu ils dus lufs, duai ussa succeder en cunvegnientscha directa tranter ils dus chantuns.

Cussegls per sajettar

L'UFAM cusseglia als dus chantuns da na sajettar ils lufs il medem mument, mabain mintgin singul. Els duain vegnir mazzads cura ch'ils auters animals da la rotscha sajan er denturn. Vitiers duain els vegnir sajettads datiers d'abitadis e durant il «temp activ» dal carstgaun. Suenter avair sajettà l'emprim luf duai vegnir observà e documentà pli intensiv il secuntegnair da la rotscha.

KORA e WWF betg dal medem maini

Ils protecturs d'animals n'èn betg perina davart il destin dals lufs dal Calanda. Entant ch'il post spezialisà KORA valitescha la decisiun da sajettar giu dus lufs sco "ponderà cun quità" crititgescha il WWF questa decisiun sco acziun malponderada.

Tenor il WWF saja normal ch'ins vesia lufs en vitgs u schizunt en citads. I na dettia betg in cumportament problematic dals lufs che giustifitgassi da sajettar els. KORA perencunter è da l'avis che cun sajettar giu dus lufs prendia la Confederaziun serius las temas da la populaziun. I valia da chattar in cumpromiss.

RR novitads 10:00

Artitgels legids il pli savens