Siglir tar il cuntegn
Inhalt

Chantun Dumagnà: A pe da Puntraschigna a Surrein

El ha dumagnà! Suenter tschintg dis e 140 kilometers è noss redactur Gian-Marco Maissen arrivà a Surrein. Quest’emna è el i davent dad ina da sias patrias en l’autra, davent da Puntraschigna en l’Engiadina Ota fin a Surrein en la Surselva.

Il padrin da Gian-Marco Maissen beneventa el.
Legenda: Il padrin da Gian-Marco Maissen beneventa el. RTR, Valentin Schmed

Mirà enavos ha el patì il pli fitg bunamain ils emprims dus dis, cunzunt perquai ch’el n’era betg disà da chaminar uschè ditg durant in di. Ma mintga di saja alura i pli tgunsch dad ir a pe, di Gian-Marco Maissen. La motivaziun saja stada gronda, cunzunt sin il davos tschancun.

Gian-Marco Maissen recumonda vinavant a mintgin a viagiar tras l’atgna patria ed ir sin ils fastizs d’istorgias.

Il davos di da viadi: Da Glion a Surrein

Noss reporter Gian-Marco Maissen ha passentà la notg passada a Tischinas sur Glion. Mario e Patricia Cadruvi abiteschan là ed èn stads ospitants per noss reporter.

Igl è stà l'ultima notg avant ch'el è sa mess sin via per l'ultima etappa da sia tura «Da patria - a patria». La finala è el arrivà saun e cun plaschair a Surrein.

Venderdi: 05-08-2016 Glion – Danis-Tavanasa – Surrein

Di 5: Glion - Surrein
Legenda: Di 5: Glion - Surrein SchweizMobil

Temp d'arrivada (circa):

07:00 Glion
08:15 Rueun
10:00 Vuorz
11:30 Danis- Tavanasa
14:30 Trun
16:00 Surrein

Jakob Pfister ha raquintà l'istorgia dal Munt Sogn Gieri.
Legenda: Jakob Pfister ha raquintà l'istorgia dal Munt Sogn Gieri. RTR, Gian-Marco Maissen

La legenda dal Munt Sogn Gieri

A Vuorz è Gian-Marco Maissen viandà sper la ruina dal chastè da Munt Sogn Gieri – la pli gronda tur da la Surselva cun ina lunga istorgia. Il scolast da Rueun, Jacob Pfister, ha raquintà ad el la legenda dal Munt Sogn Gieri. Il nausch chastellan Gieri tirannisava ils purs en il conturn. Ils purs n'han dentant betg laschar plaschair quai pli ditg ed han vulì assassinar el... Tadlai la legenda.

purtret d'in pèr pensiunà
Legenda: Marlis e Ciril Friberg da Danis. Els han purschì ina tschavera a Gian-Marco. RTR, Gian-Marco Maissen

Marenda a Danis

A Danis han Marlis e Ciril Friberg offrì a Gian-Marco ina tschavera. Ciril Friberg ha raquintà da la senda tranter Vuorz e Danis ch'i dat pir dapi 6 onns. Gian-Marco è viandà sin quella senda en direcziun Danis. Silsuenter ha la via manà vinavant envers Trun.