Duai la lescha da scola gia vegnir revidida?

La deputada liberaldemocrata Angela Casanova Maron vul che la lescha da scola vegnia revidida. Quai gia suenter trais onns. Ils custs sajan stads bler memia auts. Enstagl da 10,4 milliuns haja la scola custà al chantun passa 25 milliuns francs.

La deputada da la PLD Angela Casanova Maron vul reveder la lescha da scola gia suenter trais onns.

Legenda da maletgs: Angela Casanova Maron La deputada da la PLD Angela Casanova Maron vul reveder la lescha da scola gia suenter trais onns. mad

Angela Casanova Maron, deputada da la partida liberaldemocratica (PLD) aveva vulì incumbensar la regenza da far ina nova calculaziun per las pauschalas dal chantun per las scolas regularas. Ils custs per la scola sajan stads bler pli auts che calculads e debatads durant la debatta da la nova lescha da scola l'onn 2013. Las consequenzas da la differenza da custs haian da purtar las vischnancas. Enstagl da 10,4 milliuns francs saja uss vesibel en il rendaquint statal, ch'ils custs supplementars per la scola èn creschids sin passa 25 milliuns francs.

«Na» unanim a l'emprima incumbensa

Il Cussegl grond ha dentant stritgà unanimamain l'incumbensa da Angela Casanova Maron. Quai na fetschia nagut, di ella, i na fetschia numnadamain nagin senn da debattar surlonder tgi ch’haja da «pajar uss il Peder nair». Ella ha persuenter gia preparà ina nova incumbensa cun laquala ella pretenda da la regenza, ch'ella mussia, tge exact ch’èn ils facturs che procuran per tals custs, e tge mesiras ch'i fiss da prender. Per la nova incumbensa a la regenza rimna ella uss vuschs da deputadas e deputai.

Secunda incumbensa va gia tras las retschas dal Cussegl grond

Il votum dad Angela Casanova Maron ha dentant clamà replitgants sin il tarpet. Il socialdemocrat Jon Pult per exempel ha manegià, ch'i na saja betg da sa dispitar sur da quai, schebain la furmaziun haja custà memia bler u betg. En la furmaziun sajan ils daners numnadamain investids bain. Medemamain ha la socialdemocrata Sandra Locher Benguerel, ch’aveva manà sco presidenta da la cumissiun per furmaziun la debatta tar la nova lescha da scola replitgà, che las scolas grischunas hajan bunas notas, e cumpareglià cun auters chantuns sajan ils custs anc adina betg fitg auts.

RR Actualitad 11:00