Siglir tar il cuntegn

Header

tavla d'inscripziun «Dretgira administrativa dal chantun Grischun»
Legenda: Tavla da la Dretgira adminstrativa dal chantun. RTR
cuntegn

Chantun Dretgira na tracta betg recurs cunter modus d'elecziun

La Dretgira administrativa dal chantun Grischun n'entra betg en il recurs cunter il modus d’eleger per il Cussegl grond, quai communitgescha la dretgira. Ils recurrents aveva mess en dumonda fundamentalmain la constiziunalitad dal proceder d’eleger cun il sistem da maiorz.

La dretgira administrativa ha decis ch’il recurs è entrà cun retard ed en il medem mument ha la dretgira laschà savair ch’ella na saja betg cumpetenta per ina tala examinaziun dal process d’eleger.

Il di suenter las elecziuns dal Cussegl grond dals 18 da matg 2014 han ils recurrents proponì d'annullar il resultat da las elecziuns. Cun il recurs n'han las var 30 persunas privatas betg gì primarmain l'intenziun da pretender ina repetiziun da las elecziuns, mabain dad eliminar las mancanzas fatgas valair en la procedura electorala en vista a las proximas elecziuns l'onn 2018. Il crap da stgarpitsch èn
las vuschs che vegnan valitadas inegualmain: il circul d'Avras cun 159 persunas per exempel, il pli pitschen circul electoral cun in deputà, ha il dretg d'in mandat en il Cussegl grond exact tuttina sco il circul da Churwalden che dumbra 1'922 persunas. Tenor l'opiniun dals recurrents vegnia la quota da vuschs da las singulas electuras e dals singuls electurs uschia sfalsifitgada a moda inadmissibla. Ils
organs politics cumpetents duajan perquai vegnir obligads da crear in urden electoral confurm a la constituziun.

Nagin scleriment tematic en la sentenzia

A la dumonda, schebain il sistem electoral vertent è confurm a la constituziun u betg, n'ha la dretgira betg respundì, perquai ch'ella n'è gnanc entrada en il recurs sin fundament dal retard. Il retard è d'attribuir al fatg che la Regenza aveva fixà gia il settember 2013 en vista a las elecziuns da renovaziun totala dal Cussegl grond dal chantun Grischun per la perioda d'uffizi 2014 – 2018 per mintga circul il dumber dals deputads ch'èn d'eleger. Quest conclus è vegnì publitgà en il Fegl uffizial dal chantun Grischun ed è silsuenter restà incontestà. La dretgira administrativa vegn a la conclusiun ch'ins na po betg spetgar il resultat d'ina elecziun e pir suenter contestar, tut tenor il resultat da quella, in modus electoral determinà gia bler pli baud.

Dus onns temp per decider è tenor la PPS memia ditg

La partida populara grischuna ha acceptà la decisiun da la Dretgira administrativa grischuna da betg entrar en chaussa. En in tschert senn saja la conclusiun da la Dretgira evidenta, scriva la PPS. Sulet crititgescha la PPS che la Dretgira haja duvrà dus onns per vegnir tar questa conclusiun. La PPS è tenor atgnas indicaziuns pertutgada direct dal modus d’eleger il Cussegl grond. Tar las elecziuns dal Cussegl naziunal saja la PPS stada la pli ferma partida en il chantun, ma el Cussegl grond saja ella cun il process d’eleger actual represchentada sulet cun 9 deputads, scriva la PPS. La partida beneventass sche la decisiun vegniss persequitada d’ina ulteriura instanza.

RR novitads 06:00+

cdm/hs/ma