Dretgira administrativa: Dapli mesiras avant che sajettar il luf

La dretgira administrativa ha approvà parzialmain il recurs dal WWF cunter la decisiun dal departament da selvicultura da sajettar dus lufs giuvens dal Calanda. Il chantun avess stuì prender dapli mesiras miaivlas avant che dar la lubientscha da sajettar 2 lufs dal Calanda.

In dals lufs giuvens dal Calanda.

Legenda da maletgs: In dals lufs giuvens dal Calanda fotografà ils 24 da schaner 2016 Uffizi da chatscha dal Grischun

Las autoritads n’hajan però betg pudì cumprovar suffizientamain pertge ch’ins n’haja betg prendì mesiras pli miaivlas avant che dar la lubientscha sajettar ils lufs giuvens, communitgescha la dretgira administrativa dal Grischun. La lubientscha violeschia cunquai il principi da commensurabladad. Perquai vegnia per part dà raschun al recurs.

La fin dal 2015 aveva il departament da construcziun dà la lubientscha da sajettar dus lufs giuvens dal Calanda, quai cun l’approvaziun da la Confederaziun. La lubientscha è stada valaivla fin ils 31 da mars da quest onn.

Cunter questa disposiziun aveva l'organisaziun da l'ambient WWF fatg recurs. Sin las pretaisas dal WWF da scumandar plazzas d'estga e d'adattar la dismessa da rument sin il territori da la rotscha dals lufs dal Calanda n'è la dretgira però betg entrada.

Trais puncts avessan tuì esser stads ademplids per sajettar in dals lufs:

  • ils lufs avessan stuì s'avischinar a vitgs
  • latiers esser ensemen en il triep
  • e quai durant il di

La lubientscha è però scadida senza ch'in dals lufs è vegnì sajettà. Ils 16 da mars è in luf però vegnì sajettà illegalmain a Seglias en la Tumleastga.

RR novitads 12:00