Siglir tar il cuntegn
Inhalt

Chantun Domat daventa pli segir per peduns

Cun las correcturas da las vias en il center èsi previs da stgaffir ina colliaziun directa per peduns e da far pli survesaivels ils passadis stretgs. Ultra da quai ha la regenza era approvà in project per sanar la via da Schlans.

Vitg da Domat
Legenda: Il traject da via che sto vegnir curregì percurra per lung dal center dal vitg sco tal cun il center da cultura e da baselgia Sentupada, cun la baselgia sco er cun pliras fatschentas. MAD

Entaifer il vitg da Domat èsi necessari da meglierar las relaziuns per las pedunas ed ils peduns e per il traffic da vehichels a motor. Per part è la via stretga, nunsurvesaivla ed en parts manca in passape. Medemamain è la via en in nausch stadi architectonic: La cuvrida n'è betg resistenta a la schelira. Il traject da via che sto vegnir curregì percurra per lung dal center dal vitg cun il center da cultura e da baselgia Sentupada sco er cun pliras fatschentas. Il traffic da pedunas e peduns è perquai vaira grond.

Il project prevesa da crear ina colliaziun senza interrupziun per pedunas e peduns e da stabilisar las stretgas nunsurvesaivlas. La surstructura vegn renovada e la via vegn meglierada, uschè lunsch che la structura dal vitg circumdanta permetta quai. Per questas mesiras vegnan calculads custs da var 1,9 milliuns francs.

In plan da Domat cun dessignà il traject da via.
Legenda: Sin in traject da 400 meters vegn la segirezza per ils peduns meglierada. MAD

Via da Schlans vegn sanada

Il project per la adattaziun da la via da Schlans, Pardi – Darplauns, è vegnì approvà cun intginas permissiuns spezialas. La via è donnegiada e demussa defurmaziuns sin ils vials, che derivan da donns da schelira. La via è era per part nunsurvesaivla e transibla mo sin in vial. Il project cumpiglia il schlargiament da la via, la renovaziun da la surstructura e da l'allontanament da l'aua sco er ina meglieraziun da la geometria. Ils custs da construcziun muntan a circa 1,8 milliuns francs.

RR novitads 09:00