Siglir tar il cuntegn

Header

cuntegn

Chantun Dischoccupaziun en il Grischun è sa reducida per 112 persunas

Cun 1'541 persunas senza lavur è la quota da dischoccupaziun en il Grischun sin 1,4%. Quai communitgescha l'Uffizi per industria, mastergn e lavur.

Cumpareglià cun il favrer cun 1'653 dischoccupads è la cifra sa reducida per 112 sin 1'541 persunas. Supplementar èn 1'482 persunas vegnidas registradas che n'èn betg annunziadas sco dischoccupadas, tschertgan dentant ina plazza.

Betg dischoccupads che tschertgan ina plazza

Avrir la box Serrar la box

Quai èn persunas che prendan part a mesiras da furmaziun supplementaras u mesiras d'occupaziun. Plinavant pon quai er esser persunas che fan diever dal servetsch d'intermediaziun dals Centers regiunals per intermediaziun da lavur.

Branscha da construcziun cun pli blers dischoccupads

Da las 1'541 persunas senza lavur èn 478 dunnas e 1'063 umens. Las pli bleras persunas senza lavur han registrà la branscha da construcziun (519), la gastronomia (206), commerzi en detagl (100) sco era il sectur da sanadad e socialesser (81). Il mars 2018 han ins registrà 66 persunas dischoccupadas da lunga durada.

Quota da dischoccupaziun en Svizra da 2,9%

En l'entira Svizra è il dumber da dischoccupads sa reducì da 143'930 sin 130'413 il favrer. La Svizra ha uschia ina quota da dischoccupaziun da 2,9%. En l'entira Svizra han ins registrà 70'706 persunas betg dischoccupadas che tschertgan ina plazza.

Lavur curta en Grischun

Il mars 2018 han set manaschis cun 241 lavurants introducì lavur curta. Cumpareglià cun il mais avant cun sis manaschis e 239 lavurants è la lavur

curta s'augmentada levamain. Ina cifra exacta da lavurants cun lavur curta na pon ins betg inditgar perquai ch'ils manaschis fan giu quint retardà cun las diversas cassas publicas da dischoccupaziun.

RR novitads 08:00

Artitgels legids il pli savens