Siglir tar il cuntegn
cuntegn

Chantun Dischoccupaziun crescha per 0,2%

En il Grischun è la situaziun sin il martgà da lavur sa pegiurada il november. La quota da dischoccupaziun è creschida per 0,2% sin 1,9%.

Legenda:
Dumber da dischoccupads: Cliccar sin ils onns per activar e deactivar las lingias per cumparegliar la dischoccupaziun da differents onns. Cifras da l'Uffizi d'industria, mastergn e lavur GR (2002-2016; stan 10-10-2016)

Cun la quota da dischoccupaziun dad 1,9% èn tenor l'Uffizi per industria, mastergn e lavur dal Grischun stadas senza lavur 2'100 il november. Quai è 233 dapli che l'october. Resguardond las 1'735 persunas integradas en mesiras da lavur dals centers per intermediar lavur, resulta ina quota da passa 3,4% persunas che tschertgan lavur en il Grischun.

Il svilup negativ attirbuescha l'Uffizi per lavur a la fin da la stagiun da bajegiar. Uschia è la quota era la pli auta en las branschas da construcziun, gastronomia ed il sectur da sanadad.

Trais interpresas cun 28 emploiads han introducì danov lavur curta.

Quota svizra crescha sin 3,3% – reducziun però tar ils giuvens

La quota da dischoccupziun svizra è creschida sin 3,3% il november, mussan las cifras dal secretariat statal per economia (SECO). En tut eran il november 149'228 persunas senza lavur annunziadas tar ils center per intermediar lavur (RAV) en Svizra. Il svilup conferma la valitaziun dal SECO che la quota sa stabiliseschia sin aut nivel.

Tar la gruppa da giuvens tranter 15 e 24 onns è la quota sa reducida per 0,9% sin anc 18'921 senza lavur. Cumpareglià cun il november da l'onn passà è la quota schizunt sa redicuda per 5,6%.

RR novitads 08:00