Siglir tar il cuntegn
cuntegn

Chantun Diever dal traffic public crescha levet en il Grischun

vehichels dal traffic public cun posta bus e trens
Legenda: La cumpart dal traffic public è creschida levet (+2%), però plitost sin donn dal traffic betg motorisà. Il pli popular è anc adina l'auto en il Grischun. MAD / Transreno / Mathias Kunfermann

Las Grischunas ed ils Grischuns viageschan mintga di ina distanza da stgars 44 kilometers (senza ils viadis en l'exteriur). Per quel viadi impunda la populaziun grischuna en media 100 minutas a di. Quai resulta dal rapport da mobilitad en il Grischun. Uschia è la distanza quotidiana sco era il temp da viadi sur la media svizra (37 km en 90 min.), sumegliant sco en ils ulteriurs chantuns da muntogna. Radund mintga segund viadi vegn fatg en connex cun activitads en il temp liber. La cumpart dal traffic pendular (lavur e scolaziun) munta a 24%.

Il med da transport preferì: L'auto

La gronda part da quests viadis cun radund 70% vegn fatgs cun traffic individual motorisà, scriva la regenza. Uschia posseda era 83% da las chasadas grischunas almain in auto. Da l'autra vart vegnan 24% dals trajects fatgs cun il traffic public, ela quota dal traffic betg motorisà è tar 7%. Uschia quinta il chantun cun in lev spustament da 2% dal traffic betg motorisà – vi tar il traffic public.

Rapport da mobilitad

Il rapport da mobilitad sa basa sin retschertgas che la Confederaziun fa mintga tschintg onns davart il cumportament da la populaziun svizra en il traffic.

RR novitads 10:00