Siglir tar il cuntegn
Inhalt

Chantun Deficit da passa 23 milliuns francs – tuttina quint equilibrà

Per l'auter onn quinta il Grischun cun in deficit da 23,2 milliuns francs. Quai tar investiziuns bruttas da 446 milliuns francs, quai ha la regenza grischuna communitgà. Malgrà ch'il chantun quintia cun in deficit, saja la situaziun finanziala dal Grischun vinavant solida.

Palpiris da l'infurmaziun a las medias.
Legenda: Il chantun quinta per il 2018 cun in deficit. RTR, Telesguard

Ils puncts impurtants:

  • il deficit dal preventiv munta a 23,2 milliuns (onn precedent 20,1 milliuns)
  • creschientscha da la summa totala dals salaris da 1% (onn precedent 0,8%)
  • investiziuns bruttas da 445,6 milliuns (onn precedent 428,5 milliuns)
  • deficit dal quint da las vias da 19,9 milliuns (onn precedent 20 milliuns)
  • naginas midadas tar la dotaziun da la gulivaziun da finanzas per las vischnancas

Il deficit na saja betg sa midà grond, uschia saja il preventiv 2018 anc en il sectur verd e datiers dal resultat dal onn precedent cun in minus da 20,1 milliuns francs, scriva la regenza grischuna.

Ils custs totals èn creschids per 36 milliuns francs (+1,5%) ed ils retgavs per totalmain 33 milliuns (+1,3%). Las expensas d'investiziun èn sin in nivel da record cun 446 milliuns francs e surpassan per 85 fin 90 milliuns il quint dal 2016 e per 17 fin 19 milliuns il preventiv 2017.

Situaziun finanziala vinavant solida

Tenor la ministra da finanzas dal chantun Grischun Barbara Janom Steiner è la situaziun finanziala dal chantun vinavant solida. Per ils onns 2018-2021 prevesa la regenza ina quota da gudogn da la banca naziunala svizra da 15,9 milliuns francs. Strusch ina midada dettia quai tar la gulivaziun da finanzas naziunala. Il Grischun survegnia vinavant passa 290 milliuns francs.

Entradas da taglia – las pli impurtantas entradas per il chantun

Las entradas da taglia èn cun ina quota da 31,6% la pli impurtanta pitga d’entradas dal chantun. Ellas vegnan a crescher per 17,6 milliuns francs sin total 644,3 milliuns francs. L’augment è surtut d’attribuir a las taglias da las persunas natiralas quellas muntan a 556 milliuns francs in plus da 18 milliuns, scriva la regenza grischuna. Las entradas da las persunas giuridicas restan sin il nivel da fin uss.

Pli auts custs da persunal

En cumparegliaziun cun l'onn precedent s'augmentan ils custs per il persunal per 4,4 milliuns francs sin uss total 388,2 milliuns francs. Ed era per l'onn che vegn na possia quai betg vegnir quintà cun ina adattaziun dals salaris pervia da l'inflaziun.

Dapli per ils ospitals

Las prestaziuns da transfers s'augmentan total per 17,4 milliuns francs sin 1'130,7 milliuns francs. La gronda part da quai èn contribuziuns a communitads ed a terzas persunas. Era per ils ospitals vegnan las contribuziuns totalas a crescher il 2018. Quellas cuntanschan 233 milliuns francs quai che munta in augment da 10,4 milliuns. Era datti dapli daners per la reducziun da las premias da las cassas da malsauns quellas contribuziuns s'augmentan il 2018 per 3 milliuns francs.

Perspectivas 2019-2021

Vid la planisaziun da finanzas na dettia quai betg grondas midadas, uschia Barbara Janom Steiner. Dentant a partir dal 2020 stoppian ins quintar cun grondas sfidas. Cunzunt il svilup dals tschains d'aua na pon il mument betg vegnir stimads ed era ils svilups tar la gulivaziun da finanzas naziunala NGF e la realisaziun dal project fiscal 17.

Cun sustegn da l'interpresa BAK Economics SA ha la regenza analisà fundadamain las finanzas chantunalas ed uschia analisà ils custs principals cun agid da cumparegliaziuns interchantunalas. Surtut èn quai custs e contribuziuns per terzas persunas.

Il Cussegl grond vegn a tractar il preventiv 2018 en la sessiun dal december.

RR actualitad 12:00