Siglir tar il cuntegn

Chantun «Dear to me» u quai che stat a cor a Peter Zumthor

Il Museum d'art a Bregenz è ina da las ovras da l'architect grischun da renum mundial, da Peter Zumthor. Per festivar quest onn ses 20avel anniversari ha il museum envidà ses architect d'endrizzar in'exposiziun. Or da quai hai dà l'exposiziun «Dear to me».

Legende: Video Peter Zumthor maina tras si'exposiziun abspielen. Laufzeit 3:37 Minuten.
Or da RTR dals 15.09.2017.

L'exposiziun «Dear to me» mussa sin trais auzadas dal Museum d'art a Bregenz quai che stat a cor a l'architect grischun Peter Zumthor.

Exposiziun fitg persunala – senza exponer ovras persunalas

«Dear to me» è in'exposiziun fitg persunala – e quai malgrà che Peter Zumthor n'expona naginas atgnas ovras:

Peter Zumthor
Legenda: En l'iert da Steiner & Lenzlinger. RTR, Margarethe Sauter
Jau na vi segir betg mussar mias atgnas lavurs. Nus faschain ina sort da festa, nua ch'ins po mussar rauba e partir il plaschair.
Autur: Peter Zumthor

Ed uschia ha l'architect cumponì in'exposiziun da sias inspiraziuns. Il concept ha el fatg, ils cuntegns ha el surdà a curaturs, sco a ses figl Peter Conradin Zumthor che responsescha il program musical. Durant ils quatter mais da l'exposiziun vegni a dar radund 160 occurrenzas. 14 da quellas preschenta Peter Zumthor sez.

40'000 cudeschs ed in iert

La sala da concert è endrizzada en il foyer dal museum. En la segunda auzada envida la cumpletta biblioteca privata dal chantautur e librari Walter Lietha da sfegliar lien. Peter Zumthor ha laschà installar tut ils 40'000 cudeschs senza in catalog:

 portrait Zumthor.
Legenda: RTR, Margarethe Sauter
Jau chat bler pli interessant, da chaminar enturn e sa fixar en in cudesch e guardar quel. Nagin urden.
Autur: Peter Zumthor

En la terza auzada ha il pèr d'artists Gerda Steiner e Jörg Lenzlinger installà in iert che duai flurir durant ils proxims quatter mais a Bregenz. Els surprendan ina giada dapli cun lur cumulaziuns da creaziuns straordinarias. En l'exposiziun actuala laschan els sgular dinosaurs e renascher carottas.

RTR Telesguard 17:40