L'exposiziun «Dear to me» mussa sin trais auzadas dal Museum d'art a Bregenz quai che stat a cor a l'architect grischun Peter Zumthor.
Exposiziun fitg persunala – senza exponer ovras persunalas
«Dear to me» è in'exposiziun fitg persunala – e quai malgrà che Peter Zumthor n'expona naginas atgnas ovras:
Jau na vi segir betg mussar mias atgnas lavurs. Nus faschain ina sort da festa, nua ch'ins po mussar rauba e partir il plaschair.
Ed uschia ha l'architect cumponì in'exposiziun da sias inspiraziuns. Il concept ha el fatg, ils cuntegns ha el surdà a curaturs, sco a ses figl Peter Conradin Zumthor che responsescha il program musical. Durant ils quatter mais da l'exposiziun vegni a dar radund 160 occurrenzas. 14 da quellas preschenta Peter Zumthor sez.
40'000 cudeschs ed in iert
La sala da concert è endrizzada en il foyer dal museum. En la segunda auzada envida la cumpletta biblioteca privata dal chantautur e librari Walter Lietha da sfegliar lien. Peter Zumthor ha laschà installar tut ils 40'000 cudeschs senza in catalog:
Jau chat bler pli interessant, da chaminar enturn e sa fixar en in cudesch e guardar quel. Nagin urden.
En la terza auzada ha il pèr d'artists Gerda Steiner e Jörg Lenzlinger installà in iert che duai flurir durant ils proxims quatter mais a Bregenz. Els surprendan ina giada dapli cun lur cumulaziuns da creaziuns straordinarias. En l'exposiziun actuala laschan els sgular dinosaurs e renascher carottas.
RTR Telesguard 17:40