L’augment sa mussia cunzunt en il nord dal chantun. La raschun principala sajan envierns cun pauca naiv sco era ina rata da reproducziun pli gronda.
Per reducir la populaziun saja necessari da sajettar dapli vatgas-tschierv. En 6 regiuns auz’il chantun perquai la quota da vatgas-tschierv che duain vegnir sajettadas sin 55%.
Ansiels-chavriel dastgan vegnir sajettads durant in temp limità en tut il chantun
Er il dumber da chavriels è s'augmentà considerablamain en consequenza dals envierns miaivels. L'emprova da pilot en il Grischun dal sid, numnadamain da far chatscha sin ansiels-chavriel ils dus ultims dis da chatscha, ha gì success. Per quest motiv, e perquai ch'i èn vegnids registrads ils dus ultims onns da chatscha passa 2600 cadavers da chavriels, vegn la chatscha sin ansiels-chavriel extendida ils dus ultims dis da chatscha sin l'entir chantun.
Adattaziuns minimalas tar las autras chatschas
Tar la chatscha da chamutschs datti mo paucas midadas che pertutgan mo tschertas regiuns. En il Grischun central vegn reducida la chatscha sin animals feminins, ed en Val Müstair vegn auzada la limita d'autezza. Ils temps da chatscha per la chatscha auta 2016 sco er il diever dal telefon mobil vegnan realisads tenor las propostas da l'uniun grischuna da chatschadras e chatschaders da patenta. Plazzar estga vegn scumandà en general e chastià cun multas disciplinaras. Ils secturs da chatscha, ch'èn vegnids introducids l'onn passà cun grond success, èn sa cumprovads e vegnan cuntinuads.
RR novitads 15.00