Siglir tar il cuntegn

Chantun Dapli rumantschas fan la scolaziun da mussadra

En tut han 139 studentas e students gì il glindesdi l’emprim di da scola a la scola auta da pedagogia dal Grischun. Dals 17 Rumantschs han 12 cumenzà il studi per daventar scolast/a primar/a e 5 per daventar mussadra da scolina.

 17 students e studentas da la Rumantschia han cumenzà il glindesdis lur studi a la scola da pedagogia a Cuira.
Legenda: 17 studentas e students da la Rumantschia han cumenzà il glindesdi lur studi a la scola auta da pedagogia a Cuira. RTR

Ils 139 students novs derivan da sis chantuns Svizzers, dal Principadi dal Liechtenstein e da la Germania. Uschia studegian actualmain 453 persunas a la Scola auta da pedagogia dal Grischun a Cuira.

Bun dumber da students rumantschs

Gian Peder Gregori, docent a la scola da pedagogia a Cuira è cuntent cun il dumber dals novs students Rumantschs. Cun 12 persunas rumantschas che hajan cumenzà il studi per daventar scolast primar saja il dumber, pli u main sco ils davos onns.

Plaschair fetschia dentant che gist tschintg dunnas hajan cumenzà il glindesdi il studi per daventar mussadra da scolina. «Ils davos onns avain nus gì maximal duas persunas rumantschas ch’han cumenzà quest studi. I ha perfin dà onns cun nagins Rumantschs.»

RR actualitad 07:00