Siglir tar il cuntegn

Chantun Dapli passagiers van cun la Viafier retica

La Viafier retica è cuntenta cun l'onn 2017. Uschia ha la Viafier retica transportà quest onn 3,9% dapli passagiers che l'onn avant. Quai è vegnì communitgà a la conferenza da medias annuala.

Legende: Video Viafier Retica stat avant grondas sfidas abspielen. Laufzeit 2:24 Minuten.
Or da Telesguard dals 19.12.2017.

En spezial las lingias da la Viafier retica en l'Engiadina han registrà dapli passagiers. Sin la lingia tranter Cuira e San Murezzan è quai stà in plus da 5,2%, sin la lingia tranter Landquart e San Murezzan schizunt in plus da 12,8%. In augment hai però er dà sin la lingia dal Bernina (+5,6%) tar il «Glacier Express» (+10,3%) ed il «Bernina Express» (+2,4%).

Dapli transport d’autos tras Veraina

Il transport d’autos tras il tunnel dal Veraina è s’augmentà per 4,5% en cumparegliaziun cun l’onn avant. Ed era la svieuta dal transport tras il Veraina è s'augmentada per 5,4%. Tar il traffic da rauba noda la Viafier retica in creschament da 16,4%.

App duai gidar ad optimar las purschidas

La digitalisaziun duai vegnir nizzegiada en plirs secturs e quai tant per ils clients sco era per meglierar l’effizienza, communitgescha la Viafier retica. Cun in'app è uschia vegnì optimà il process «communicaziun en cas da disturbis». E la Viafier retica ha era lantschà in'app che pussibilitescha als collavuraturs d’inditgar irregularitads sin la rait per meglierar la qualitad da la purschida.

Sfidas per il 2018

Per il 2018 vul la viafier vinavant renovar plirs tunnels e viaducts. In dals projects centrals vegn ad esser il nov center d’infrastructura a Landquart. Il punct culminant è la perfuraziun dal tunnel dal Alvra ch'è planisada per l'atun.

RR novitads 11:00