Bunamain 3'000 persunas han dà suatientscha a l’invit da la Banca Chantunala Grischuna (BCG) ed èn sa radunadas en la halla da la citad a Cuira per tadlar davart il bun onn e mangiar ina buna tschavera.
Betg ina sfida da cuschinar per 3’000 persunas
Quai saja sco da cuschinar per 4 persunas, di il schef da catering Christoph Tobler. I dovria ina buna preparaziun, bunas instrucziuns tar ils 186 lavurers che gidan ed in zic controlla. E lura funcziunia quai sco giavischà. Cuschinà vegn en chazzettas ch’èn dubel uschè grondas sco ina bognera classica. Il menu è ina terrina da pulenta e spinat cun ina vinaigrette da tomatas, charn da vadè cun bizochels, arveglia e carottas e sco dessert ina turta da farbuns en il magiel. La gronda sfida sajan las temperaturas dal matg, manegia Tobler. I saja da far attenziun, ch’il vin cotschen na vegnia betg memia chaud.
Nagin restaurant
Sch’il vin fiss memia chaud na fiss quai betg uschè nausch, manegia Alois Vinzens, il parsura da la direcziun da la Banca Chantunala Grischuna. La fin finala na saja la halla da la citad da Cuira betg in restaurant. Per il pli hajan els adina buns resuns dals osps. El sa legria sin ina buna tschavera e da star da cuminanza cun in u l’auter participant. Ils osps han laschà plaschair las spaisas. Ellas sajan stadas chaudas, bunas ed ì haja dà avunda.
Gudogn da record munta da pli dividenda
L’onn passà ha la BCG fatg in gudogn da record da passa 180 milliuns francs. Per consequenza augmenta la banca la dividenda per dus sin 40 francs. Tut en tut reparta la banca dividendas en l'autezza da passa 100 milliuns francs. Quai han ils responsabels communitgà la sonda a la radunanza da participants a Cuira.
RR novitads 15:00
