Siglir tar il cuntegn

Header

cuntegn

Chantun Dapli armas en il Grischun

Adina dapli Svizzers vulan armas, scriva il «Tagesanzeiger». Ed era en il Grischun è il dumber da permiss per dastgar aquistar in'arma s'augmentà; quai per 28%.

Sco represchentants da la lobby da armas dian envers il «Tagesanzeiger» saja in motiv per l'augment da dumondas da permiss per armas, il basegn da proteger sasez. La populaziun haja dapli tema pervia da tut las malsegirezzas sin il mund. Sco Roman Rüegg da la polizia chantunala dal Grischun di, hajan dentant mo 2 da 624 persunas dumandà l'onn 2015 in permiss per ina arma cun questa motivaziun. Las bleras dumandas sajan per armas da chatscha ubain per armas da sport.

Dapli persunas vulan la patenta da chatscha 2016

Sco l'uffizi da chatscha di, hajan l'onn 2015 betg dapli chatschadurs fatg la patenta. Il dumber da chatschaders novs saja stà en il rom dals davos onns. Nov saja dentant, che bunamain 20% dapli persunas sajan s'annunziads per far la patenta da chatscha per l'onn 2016.

Vendita d'armas na senta nagin augment

Da quai na sentan las fatschentas da armas dentant anc nagut. Ellas na han betg vendì dapli buis - ed ellas n'han er betg sentì ch'il dumber da permiss saja s'augmentà uschè fitg. Er tar las buis e pistolas da sport saja la vendita plitost ida enavos. Perquai che er las uniuns da tir han adina damain commembers.

Tge che èn pia propi ils motivs per l'augment dals permiss, è anc be speculaziun.

RR Actualitad 11:00

Artitgels legids il pli savens