Mintg'onn puspè vegn l'unda da grippa en Svizra. Ina giada gia il december, l'autra giada pir il favrer. Tge ch'è segir è, ch'ella vegn durant l'enviern. La raschun è ch'ils virus han gugent il fraid, quai di l'infecziologa da l'ospital chantunal Alexia Cusini. En il fraid e sitg pon els sa derasar meglier. Perquai èn els activs l'enviern. Cura che nus avain stad è la grippa sin la mesadad dal sid dal mund, l'enviern vegn ella puspè tar nus.
Mintg'onn novs virus
La raschun che nus pudain survegnir mintg'onn da nov la grippa è ch'ils virus sa midan, els muteschan. Mintg'onn vegnan novs e betg mo quai. I na dat betg LA grippa, mintg'enviern datti numnadamain plirs tscheps da virus cun differentas fermezzas. I po pia esser ch'ins ha pliras grippas durant ina stagiun da grippa, perquai ch'ils virus èn differents. E cunquai ch'els sa midan adina puspè, na vegnin nus er betg immuns encunter la grippa sco per exempel encunter la virola selvadia.