Siglir tar il cuntegn

Header

cuntegn

Chantun Da la primavaira enavos en l’enviern

Suenter dis cun aura e temperatura da primavaira s’annunzia l’enviern puspè. Pauc legraivel per quellas e quels ch’han gia midà sin pneus da stad. Sin la via principala tranter Trin e Flem ha in accident chaschunà colonnas, quai tant en direcziun Glion sco er Cuira.

La damaun tranter las 6:00 e las 7:00 na cursava er nagins trens tranter Cuira e Rehanau, quai pervi dad in disturbi tecnic. Singuls trens èn crudads ora uschia ch'ils passagiers han stuì vegnir transportads cun bus.

Privel da lavinas moderà

En l'entir chantun grischun regia il mument in privel da lavinas moderà (stgalim 2), di Kurt Winkler avertider da lavinas a l'institut federal per la perscrutaziun da naiv e lavinas a Tavau. I saja pussaivel da far turas da skis, dentant stoppian ins dar adatg sin spundas taissas. Là, nua ch'ì ha navì fitg, èsi dad esser precaut. Surtut en la vallada dal Rain Anteriur e Posteriur, sco era en la Val Calanca ed il Mesauc, saja da quintar cun radund 30 centimeters naiv nova.

Pli pitschens saja il privel da lavinas en l'Engiadina. Là stoppian ins mo dar adatg sur 2'600 meters e spundas vers nord. Il privel da lavinas moderà resta pli probabel enfin sonda. Dumengia, cura che l'aura daventa pli bella e miaivla, po il privel da lavinas bletschas crescher.

Artitgels legids il pli savens