Siglir tar il cuntegn
cuntegn

Chantun Cussegl grond: Vischnancas duain restar autonomas, dentant...

Il Cussegl grond fa puspè ina revisiun totala. Questa giada tar la lescha da vischnancas ch'è passa 40 onns veglia. I duai dar insaquantas midadas – sut il stritg duain las vischnancas dentant restar autonomas.

Co funcziuna la charta?

Smatgar sisum dretg en il chantun sin «Visible layers». Lura tscherner ina da las opziuns. Adina be activar ina charta. Cun far il «clic» sin ina vischnanca datti ina curta survista.

Il Cussegl grond reveda totalmain la lescha da vischnancas. Ina lescha ch'è passa 40 onns veglia. Da principi duai l'autonomia da las vischnancas restar. Pia mintga vischnanca po er en il futur decider bler sezza. Per exempel sch'ella vul ina votaziun a l'urna u na, sch'ella vul ina radunanza communala u na, sch'ella vul in parlament u na – ed er il dumber da suprastants po ella decider sezza.

Inqual chaussa duai dentant er sa midar

La revisiun fiss dentant betg necessaria sche nagut sa midass. Qua las pli impurtantas midadas:

  • Las radunanzas communalas sco er sedutas dal parlament duain esser da principi publicas – per exempel er per las medias. In'obligaziun da prender recusaziun na duain las vischnancas betg pli pudair prevair. (decidì: radunanzas communalas daventan publicas)
  • L'excorporaziun da facultad da vischnancas burgaisas na duai betg pli esser pussaivla. Cun excepziun sche la facultad vegn excorporada a vischnancas politicas.
  • Fusiuns duain, sin basa da las experientschas ch'èn vegnidas fatgas, vegnir regladas pli concis. I vegn perencunter desistì d'ina rolla pli activa da la regenza areguard ils projects da fusiun.
  • Differents termins vegnan adattads dal temp dad oz respectiv a las circumstanzas midadas. Per exempel la convocaziun da la radunanza communala u l'inoltraziun dal quint annual.
  • I na pon betg pli vegnir furmadas novas fracziuns sco corporaziuns autonomas.
  • Votaziuns consultativas èn admessas sin basa dal dretg chantunal e senza ina basa supplementara en il dretg communal.
  • Ils statuts da las corporaziuns da vischnancas na ston betg pli vegnir approvads da la regenza.

Quai prevesa il messadi che la regenza ha preparà per il Cussegl grond. Cunzunt dus puncts pudessan dar da discutar tar las deputadas ed il deputads: Numnadamain che las radunanzas communalas duain da principi esser publicas ed er che l'excorporaziun da facultad da vischnancas burgaisas na duai betg pli esser pussaivla.

Legenda: Guardar il video Revisiun totala da la lescha da vischnancas. Durada 01:15 minutas.
Or da RTR dals 13.10.2017.

RR actualitad 12:00