La sessiun d'avust dal Cussegl grond ha lieu en la halla da la citad da Cuira. Quai ha decidì la conferenza dals presidents dal Cussegl grond. Quella decisiun n'haja betg dà grondas discussiuns, uschia il president dal Cussegl grond Alessandro Della Vedova.
Igl è raschunaivel da far la sessiun extra muros. En la sala dal Cussegl grond èsi stretg, senza mesiras na gess quai betg. Nus avain la finala er ina funcziun d'exempel.
Custs da 100'000 francs
Ils custs per la sessiun extra muros en la halla da la citad muntian a radund 100'000 francs. Tenor Alessandro Della Vedova possian ins profitar d'ina gronda part da las installaziuns da l'ultima sessiun ch'era er gia stada en la halla da la citad. Lezza aveva custà 250'000 francs.
Sclerir per la sessiun d'october
Er per la sessiun d'october e sessiuns che suondan sclerescha il secretariat dal Cussegl grond gia tge variantas ch'i dess. La conferenza dals presidents haja surdà en quai senn ina incumbensa, uschia Della Vedova vinavant. I giaja cunzunt per sclerir las pussaivladads ed ils custs.
