Siglir tar il cuntegn

Chantun Cussegl grond: Elecziuns, elecziuns, elecziuns

Ch’i na va betg pli uschè ditg fin a las elecziuns naziunalas, badan ins era vi da la sessiun d’avust dal parlament grischun. I vegnan tractadas bleras dumondas singulas che servan era sco tribuna per singuls parlamentaris/candidats ed era anc ina autra elecziun stat sin l’agenda.

Sessiun d’avust: Las debattas en il Cussegl grond cuntinueschan puspè.
Legenda: Sessiun d’avust: Las debattas en il Cussegl grond cuntinueschan puspè. RTR, M. Decurtins

Las fatschentas da paisa da la sessiun dal Cussegl grond èn: la revisiun parziala da la lescha da taglia grischuna, la revisiun totala da la lescha per il svilup da l’economia e la decisiun davart la nova praschun da Realta.

Pitschnas schanzas per limita

Bler da discutar astgass dar la revisiun parziala da la lescha da taglia grischuna. In aspect spinus è la deducziun per pendularis. La regenza grischuna propona in maximum da 9’000 francs. Enfin d’uss dependa quella summa da quant ch'ins dovra effectiv per pendular a la lavur. Questa mesira pertutgass 3’000 pajataglias grischuns e purtass al Chantun 750'000 francs.

Per ils pendularis pertutgads muntass quai ch’els avessan da pajar en media 250 francs ad onn dapli taglia. Ils cristiandemocrats èn da l’avis che quai saja ina attatga frontala sin las regiuns perifericas che sajan dependentas dal pendular. Ed er ils liberaldemocrats, la pli gronda fracziun en il Cussegl grond è cunter la limita da 9'000 francs.

Promoziun d’interpresas singulas per la segunda

In ulteriur tema da paisa da la sessiun d’avust dal Cussegl grond vegn ad esser la revisiun totala da la lescha per il svilup da l'economia. En il center da la dispita actuala para in’ulteriura giada a star la promoziun dad interpresas singulas. La Partida cristiandemocratica (PCD) vul mantegnair quella: quai cunter la proposta da la regenza da disfar ella. La promoziun d’interpresas singulas saja in instrument da success. Dal medem avis sco la regenza è la Partida liberaldemocrata (PLD).

Elecziuns, elecziuns, elecziuns

Il vicepresident vertent dal Cussegl grond, il cristiandemocrat Vitus Dermont vegn en ina da las emprimas tractandas da la sessiun d’avust a vegnir elegì sco nov president. Sco vicepresident è proponì il liberaldemocrat Michael Pfäffli.

Las elecziuns dal parlament Svizzer ils 18 d’october han dentant era in grond effect sin la sessiun dal parlament grischun. Betg mo vegnan tractadas bleras dumondas ed incumbensas da singuls parlamentaris ch’èn candidats en las elecziuns l’october, na, era fan las communicaziuns da las partidas fitg ferm la parita d’elecziuns. Uschia croda en egl che quasi tut ils candidats sin la glista da la PCD, vegnan numnadas explicitamain en las communicaziuns dals cristiandemocrats per la sessiun dal Cussegl grond.