Cussegl grond atun 2019 - Da 56'000 sin 120'000 francs – dapli raps per la legislativa

Dapli raps per la lavur da las fracziuns en il Cussegl grond – quai pretenda la conferenza dals presidents da fracziuns dal Cussegl grond. Per quest intent veglia la conferenza da presidents reveder ina part da l’urden da gestiun dal Cussegl grond.

Quai resorta dal rapport da la conferenza, ch’è vegnì publitgà ensemen cun ils ulteriurs documents per la sessiun d’atun 2019 dal Cussegl grond.

Da 56'000 sin 120'000 francs

56'000 francs per indemnisar la lavur da las fracziuns na bastia pli, scriva la conferenza da presidents. La lavur vegnia pli e pli cumplexa e perquai stoppia quai dar dapli raps. Ella vul augmentar l’indemnisaziun per mintga fracziun da 4'000 sin 12'000 francs e l’indemnisaziun per deputda o deputà da 300 sin 500 francs.

Ils raps hajan da vegnir duvrads exclusivamain per la fracziun. I na sa tractia betg dad ina finanziaziun da partidas, punctuescha la conferenza en ses rapport.

Be ils auters survegnan dapli raps

En pli argumentescha la conferenza da presidents che las resursas en Grischun vegnian trapartidas da maniera unilaterala a favur da l’administraziun chantunala. Il Cussegl grond na possia uschia betg «nizzegiar bain avunda il spazi tar sia lavur sco legislativa».

Per rinforzar si’argumentaziun ha la conferenza da presidents retschertgà la situaziun en auters chantuns. Quella confermia lur argumentaziun : Er en auters chantuns survegnissan ils parlaments dapli raps per pudair lavurar meglier ed a cas er consultar experts externs sco sustegn.

RTR rapportaziun actuala