Per ina schlingia, ina chapitscha u era per accessoris dovri bler temp, declera Lydia Pedrett, presidenta da la «Fellnähgruppe Calanda». Pliras uras dovra ella per cuser ils products.
L’uniun dumbra actualmain 11 commembers (9 activs, 2 passivs). Ils products ch’els creeschan cun la pel vegnan per gronda part vendids. Spezialmain durant fieras marschia la fatschenta, di Lydia Pedrett.
Sa mintgin cuser pel-cunigl?
Tar pel-cunigl saja fitg impurtant ch’ins na rumpia betg ella. La pel saja fitg sensibla e rumpa spert sch’ins na lavura betg cun quità. Ins sto era savair co tagliar la pel, di Lydia Pedrett. Gliez saja l'A e l'O. Betg tut la pel-cunigl saja numnadamain adattada per crear in product. I dovra pia schon ina tscherta savida per savair cusar pels d’animals. Perquai porscha la «Fellnähgruppe Calanda» era curs per persunas ch'han interess. «La fin finala è il pli impurtant la passiun». Pia, ch’ins fetschia gugent questa chaussa.
Cuser pel-cunigl cun buna conscienza
Pel vaira d’animals ha in nausch num. Spezialmain pel bunmartgada ch’ins na sa betg da nua ch’ella deriva. Per ils products da pel-cunigl en Svizra, pia era da la «Fellnähgruppe Calanda», pateschan dentant nagins animals. Igl è pel d’animals che ston vegnir mazzads. La pel vegniss pia dismessa. Perquai sappian els far cun buna conscienza lur products, di la presidenta da l’uniun. Els survegnan la pel-cunigl d’allevaturs ch’els enconuschan e san ch’ils cunigls vegnan tegnids bain.
