Siglir tar il cuntegn
Inhalt

Chantun Cun nov schlantsch en la stagiun d'enviern?

L'euro è puspè or dal tschaler, i ha dà naiv enfin giusum ed ils economs prognostitgeschan in creschament da l'economia. Las premissas èn pia bunas per avair ina buna stagiun d'enviern, dentant, tanschan bunas premissas? Discussiun cun ils exponents.

Far pista è quest onn gia baud stà pussaivel.
Legenda: Bully Far pista è quest onn gia baud stà pussaivel. Keystone

«Na, il problem è betg schlià be cun ina buna entschatta da l'enviern, la midada dal clima resta», di Anita Mazzetta, manadra dal WWF Grischun.

Quai fetschia bain plaschair da vesair ils culms alvs, dentant per il turissem saja da patratgar a lunga vista - betg bajegiar dapertut novas pendicularas ubain indriz da far naiv, mabain renovar quai ch'è gia enturn ed empruvar da trair a niz quai l'entir onn.

Er Martin Hug da las pendicularas Grischun sustegna per part quella opiniun e di: «La gronda fermezza dal Grischun è la natira e nus guardain da nos piz bler meglier che per exempel en l'Austria». Tuttina: I dovria dapli cooperaziun per gidar ils turissem era en il futur.

Nizzegiar pendicularas sur onn

«Ina schliaziun fiss per exempel, da nizzegiar las pendicularas tut l'onn e da vender differentas purschidas, betg be a la gruppa da quels che van cun skis, mabain er per exempel viandar, ir cun bike ubain simplamain ir en la natira», è Martin Vincenz, CEO da Grischun vacanzas, persvadì. Dentant, per pudair vender insatge, dovria quai er la purschida.

RR actualitad 12:00