Al chantun Grischun mancassan 12,8 milliuns francs da la Confederaziun, sche la refurma da taglia sin interpresas III vegniss approvada. Quai ha accentuà Toni Hess da l’administraziun da taglia dal Grischun.
Gulivaziun da finanzas vegn evaluada
Il problem è che la gulivaziun da finanzas vegniss evaluada da nov, ed il chantun perdess la finala 12,8 milliuns francs.
Dentant cuntegna la refurma era elements sco divers privilegis per las interpresas. Las consequenzas definitivas n’èn dentant betg cleras.
Bandunan las interpresas pertutgadas tar in «na» il Grischun?
Il mument n’èsi betg cler, quantas persunas giuridicas che profitassan da la refurma da taglia e quantas che bandunassan il chantun tar in «na» a la refurma, ha ditg Hess. Ma da far nagut purtass malsegirtad per las interpresas, perquai ch'ellas fissan pertutgadas da sancziuns.
Restar cumpetitivs cun ils ulteriurs chantuns
Sche la refurma vegn approvada, alura sto vegnir fatga ina revisiun chantunala da taglia sco en ils ulteriurs chantuns. Las taglias vegnissan sbassadas e restassan uschia cumpetitivas cun ils ulteriurs chantuns. Ils chantuns e las vischnancas avessan damain entradas.
RR actualitad 12:00