Per Toni Curdin Foppa è quai il tschintgavel project da pop-up ch'el realisescha durant il temp da corona, tranter auter servetschs da furniziun da sushi, tapas e brunch.
Sco giastader dal restaurant Basilik ha el ussa chattà ina pussaivladad d'ospitar ils giasts er durant il temp da lockdown. In project da pop-up nua che ils giasts pernottan en l'hotel ABC e san mangiar purschidas dal restaurant Basilik. Il pop-up actual n'è betg insatge che gida finanzialmain da surviver la crisa. Igl è dapli in test per guardar co la clientella reagescha sin il restaurant ch'ins vul avrir questa stad.
Las reservaziuns per questa fin d'emna mussan ch'il basegn da puspè ir en in restaurant è grond, era sche quai è mo pussaivel entras ina pernottaziun.
Con ditg che la collavuraziun exista n'è anc betg pussibel da dir. Entant che la gastronomia resta serrada pon ins giudair la cuschina dal Basilik en il hotel ABC. Suenter veglian ins però beneventer la glieud en las atgnas quatter paraids.